Palata spıkeri bedeldi saıystyń fınaldyq kezeńine qatysýshylarǵa iltıpat bildirip, sıfrlandyrý jáne IT-salasy elimizde ulttyq deńgeıdegi basymdyqqa ıe ekenin aıtty. Qazirgi tańda ózimizde IT-mamandar daıarlaýǵa jáne baǵdarlamalaý mamandyǵyn oqytatyn ýnıversıtetterdi damytýǵa aıtarlyqtaı ınvestısııa salynyp, memleket tarapynan úlken qoldaý kórsetilip otyrǵany da sóz boldy.
«Prezıdentimiz Qasym-Jomart Toqaev sıfrlandyrý, IT, jasandy ıntellektini damytý jáne ınnovasııalardy engizý máselelerine únemi basa mán berip keledi. Elimizde startaptarǵa qoldaý kórsetý jáne ozyq tehnologııalardy engizý baǵyty da júıeli jolǵa qoıylǵan. IT-habtar men tehnologııalyq ortalyqtar qurylyp jatyr. Osy saıysta Qazaqstandaǵy jetekshi tehnıkalyq joǵary oqý oryndarynyń bes komandasy el namysyn qorǵaıdy», dedi M.Áshimbaev.
Sondaı-aq Senat spıkeri baǵdarlamalaý adamzattyń ámbebap tili ekenin, ol túrli salanyń damýynda mańyzdy ról atqaratynyn aıtty.
«Sporttyq baǵdarlamalaý – jaı báseke ǵana emes. Bul – synı oılaýdy damytýǵa, kásibı daǵdylardy jetildirýge, kúrdeli mindetterdi oryndaýdy úırenýge jáne komandamen tıimdi jumys isteýge jol ashatyn biregeı múmkindik. Mundaı qabiletter kez kelgen salada tabysqa jetýdiń negizi ekeni anyq. ICPC qory álem boıynsha jastarǵa jańa múmkindikter berý jáne sıfrlyq teńsizdikti eńserý jolynda mańyzdy mıssııa atqaryp keledi. Sol úshin rızashylyǵymyzdy bildiremiz. Aldaǵy ýaqytta da ISPC qorymen yntymaqtastyǵymyz nyǵaıyp, birlesip nátıjeli jumys isteımiz dep senemin», degen ol jarysqa qatysýshylarǵa sáttilik tiledi.
Sonymen qatar Palata tóraǵasy ICPC qorynyń atqarýshy dırektory Ýılıam Paýchermen elimizde sporttyq baǵdarlamalaýdy odan ári damytý keleshegin talqylady. Atap aıtqanda, qatysýshylardy daıarlaý, jattyqtyrýshylardyń biliktiligin arttyrý, joǵary oqý oryndaryn qajetti ınfraqurylym jáne materıaldyq-tehnıkalyq turǵydan jabdyqtaý jáne basqa da ózekti máseleler sóz boldy. Ýılıam Paýcher óz tarapynan Máýlen Áshimbaevqa Qazaqstannyń baǵdarlamalaýdy qoldaǵany jáne elde keńinen dáriptegeni úshin rızashylyǵyn bildirdi.
Aıta keteıik, International Collegiate Programming Contest (ICPC) – álemdegi 110 eldiń úzdik joǵary oqý oryndarynyń basyn qosatyn sporttyq baǵdarlamalaý boıynsha eń kóne, eń iri jáne eń bedeldi jarys. Astanada 15-20 qyrkúıek aralyǵynda ótetin 48-inshi chempıonattyń fınalyna álemniń ár túkpirinen 600 baǵdarlamalaýshy qatysyp jatyr.
Fınaldyq kezeńde elimiz atynan Nazarbayev University, Halyqaralyq aqparattyq tehnologııalar ýnıversıteti, Astana IT University jáne Qazaqstan-Brıtan tehnıkalyq ýnıversıteti óner kórsetedi. Buǵan deıin Halyqaralyq aqparattyq tehnologııalar ýnıversıtetiniń komandalary ICPC World Finals álemdik fınalyna 5 ret shyǵyp, Soltústik Eýrazııa aımaǵy boıynsha úzdik 12 joǵary oqý ornynyń qatarynan kóringen edi. Byltyr ICPC álem chempıonatynda otandasymyz Batyr Sardarbekov el tarıhyndaǵy alǵashqy altyndy jeńip aldy.
