Eýrazııalyq energetıkalyq korporasııasynyń jáne Qazaqstan alıýmınııi kompanııasynyń ujymdarymen kezdesýlerde shtab músheleri energetıka salasyndaǵy mańyzdy problemalarǵa, naqty aıtqanda, onyń tapshylyǵyna jáne elektr stansalarynyń tozýy men ımportqa táýeldilik máselelerine jan-jaqty toqtaldy.
Senat tóraǵasy atap ótkendeı, bizdiń elimiz jan basyna shaqqandaǵy kómirqyshqyl gazynyń shyǵaryndylary boıynsha álemde aldyńǵy oryndardyń birin alady. Osy oraıda elimizde kómirtegi qaldyǵyn azaıtý úshin óndiriske ınnovasııany keńinen engizýdiń mańyzy zor. Bul rette eldegi energııa tapshylyǵyn aýaǵa kómirqyshqyl gazyn barynsha az shyǵaratyn energııa kózderi arqyly sheshý máselesi óte ózekti.
«Prezıdentimiz Qasym-Jomart Toqaevtyń maquldaýymen 6 qazanda elimizde AES salý máselesine qatysty respýblıkalyq referendým ótedi. Referendýmnyń mańyzy men mindetterin jan-jaqty túsindirý úshin Halyq shtaby quryldy. Onyń quramynda depýtattar, partııalar men túrli uıymdar jáne el erteńine beıjaı qaramaıtyn belsendi azamattar bar. Túsindirý jumystary barlyq oblysta, qalada jáne aýylda keńinen júrgizilip jatyr. Osy oraıda azamattarymyzdyń belsendiligi, bastamashyldyǵy jáne el erteńine sergek qaramaıtyny qýantady. Bizdiń búgingi kezdesýimiz de jemisti bolady dep úmittenemiz. Sondaı-aq sizderdiń árqaısyńyz aldaǵy referendýmǵa belsendi qatysasyzdar dep senemiz», dedi M.Áshimbaev.
Sonymen qatar shtab músheleri Jastar bastamalaryn damytý ortalyǵynda óńirdiń belsendi jastarymen kezdesti. Senat tóraǵasy jas býyndy qoldaý memlekettik saıasattyń basym baǵyty ekenin tilge tıek etip, osy saladaǵy reformalardyń mánine nazar aýdardy. Palata spıkeri el bolashaǵyna yqpal etetin másele kún tártibine shyǵarylǵan referendýmǵa jastardyń belsendi qatysýy mańyzdy ról atqaratynyn aıtty.
Shtab músheleri óńirdegi sarapshylar qaýymdastyǵymen kezdesýde jalpyulttyq referendým eldiń damýy jolynda sheshýshi mánge ıe ekenine toqtaldy. Suhbat kezinde AES-tiń elge berer ıgiligin halyqqa sapaly ári jan-jaqty túsindirýdiń mańyzdy ekeni de aıtyldy.
