Osynaý keńdik pen kelisimniń arqasynda Islam dinin qabyldap jatqan ózge din ókilderi az emes. Máselen, qazir ıslam dinin qabyldaǵan orys ultynyń ókilderin kórý tańsyq bolmaı qaldy. Degenmen taıaý kúnderi el tarıhynda buryn-sońdy bolmaǵan eleýli oqıǵa oryn aldy. Ol – Dmıtrıı Ostrovskıı esimdi tuńǵysh qarıdyń shyǵýy. Onyń musylmansha aty-jóni – Abdýrrahman Altaı.
Qarı – Quran kárimdi tolyq jattaǵan adam. Myń jarym jyldan beri qasıetti Kitaptyń bir árpi de ózgermeı búgingi kúnge jetýi – uly amanatty arqalaǵan qarılardyń arqasy. Elimiz táýelsizdik alǵan tusta burynǵy ateıstik saıasat kesirinen elde birde-bir qarı qalmaǵan edi. Alaıda odan bergi jyldary medreseler men qarılar daıarlaý ortalyqtarynyń ashylýy nátıjesinde qazir Qurandy tolyq jattaǵan din ókilderiniń sany júzdep sanalady.
Biz Abdýrrahmandy áńgimege tartyp, Islam dinine bet burýy men Quran jattaý jolyna qatysty syr sýyrtpaqtadyq. «Men Shyǵys Qazaqstan oblysynyń Zyrıanov qalasynda dúnıege kelip, mektepti sol jerde bitirdim, deıdi ol. 2019 jyly bir issaparǵa barǵanymda musylmandarmen birge jumys istedim. Alǵash ret solardan Islam dini, Quran men hadıs týraly kóp málimet alyp, osy jyly Islam dinin qabyldadym».
Bastapqyda ata-anasy men baýyrlary onyń bul sheshimine tańǵalǵany túsinikti. Degenmen, keıin kele bári de onyń bul sheshimin quptaǵan. Ásirese ákesi ulynyń durys qadam jasaǵanyn aıtady eken. «Quran jattamas buryn aldymen arab álipbıin úırendim. Ol kezde kúnine bir áripten jattaıtynmyn. 2-3 aıdan keıin álipbıdi tolyq meńgergen soń, birtindep Quran úırene bastadym. Bir kúni meshittegi ustaz nıetimdi baıqap, medresege túsýge shaqyrdy. Bul kezde men jarty parany jatqa biletin edim. Sosyn medresede jedeldetilgen baǵdarlamamen Qurandy qaıtadan basynan úırenip, eki jarym jyldyń ishinde tolyq jattap shyqtym» deıdi qarı.
Biz odan musylman bolǵannan keıin ómiri qalaı ózgergenin suradyq. Onyń aıtýynsha, adam balasy Qurandy tereńirek bilgen saıyn ómirdiń mán-maǵynasyn tereń túsinedi. «О́mirge degen kózqarasym ózgerdi. Izgi amal jasaýǵa umtyla tústim. Men adamdarǵa Qurandy jıi oqýǵa keńes berer edim. Ol ımanymyzdy tereńdetedi. Mundaı ózgeristi eń alǵash jattaýdy bastaǵanda-aq ańǵardym. Arabshany jaqsy bilmegendikten, Qurannyń aýdarmasyn oqıtyn kezim edi. Al qasıetti kitapty tolyq jattap, qarı bolýdyń orny múldem bólek. Siz oǵan bálkim 2-3 jyl ómirińizdi arnarsyz, biraz qınalarsyz, biraq onyń myna dúnıedegi ári keıingi ómirdegi paıdasy men saýaby sheksiz. Árqaısymyzda sol ıgilikke keneletin múmkindik bar. Soǵan talpynýymyz kerek», deıdi A.Altaı.
Biz qarıdan ózi tolyq biletin Qurannyń ishinen qaı aıat unaıtynyn suraǵanymyzda, «Fýssılat» súresiniń 33-aıaty janyna jaqyn ekenin aıtty. Onyń maǵynalyq aýdarmasy: «Alla jolyna shaqyryp izgi amal jasaǵan jáne shyn júrekten «men shynaıy musylmanmyn» dep aǵynan jarylǵan adamnan artyq, sózi jaqsy kim bar?..»
Abdýrrahman aldaǵy ýaqytta ıslam ǵylymyn tereńnen meńgerip, haqqa yqylasty adamdarǵa dindi úıretkisi keletinin aıtyp: «Meniń armanym – qoǵamǵa paıdaly bolý» dep sózin túıindedi. Biz óziniń júrek qalaýymen ımandylyq jolyn tapqan baýyrymyzǵa sáttilik tiledik.
