ASTANA. 28 sáýir. AQSh-tyń ataqty CNN telearnasynyń túsirý toby 2022 jylǵy qysqy Olımpıadany ótkizýden úmitti Almaty qalasy týraly arnaıy baǵdarlama daıyndaý úshin Qazaqstanǵa keldi. Sheteldik telearnanyń túsirý jumystaryna bokstan álem jáne Azııa oıyndarynyń chempıony Jánibek Álimhanuly (75 kg.) keıipker retinde arnaıy qatysty. Bul týraly Qazaqstan boks federasııasynyń resmı saıty kfb.kz habarlady.
Túsirý kezinde Jánibek Qazaqstannyń boks mektebi men qazaq sporty týraly aıtty. Sondaı-aq, ol Almatynyń barlyq talaptarǵa saı ekenin nazarǵa alyp, 2022 jylǵy Olımpııalyq oıyndardyń qazaq jerinde ótetininen úmitti ekenin jetkizdi.
Sonymen qatar, amerıkalyqtar Jánibektiń bokstaǵy jetistikteri men onyń sheberligine qyzyǵýshylyq bildirli.
«Qazaqstan – kóptegen Olımpıada jáne álem chempıondaryn tárbıelep shyǵarǵan, sportta ózindik úlesi bar memleket. Memleket basshysynyń tikeleı qoldaýymen elimizde halyqtyń sportpen shuǵyldanýyna barlyq jaǵdaı jasalǵan. Men óz tarapymnan bıyl ótetin Katardaǵy álem chempıonaty men kelesi jyly Rıo-de-Janeıroda alaýy tutanatyn Olımpıadada jankúıerler senimin aqtaý úshin ter tógemin», – dedi qazaq boksshysy.
Aıta keteıik, 2022 jylǵy Oıyndardy ótkizýden Almatydan bólek, Qytaı astanasy – Beıjiń qalasynyń da úmitker ekeni belgili. Atalǵan Olımpıadanyń astanasy osy jyldyń 15 shildesinde Malaızııada anyqtalady.
Elaman Qońyr.
Derek, sýret: kfb.kz.
