«Halyq óz tańdaýyn jasady»

PETROPAVL. Soltústik Qazaqstanda saılaýǵa belsene qatysqandardyń biri sharýa qojalyqtarynyń ıeleri boldy. Bul týraly egemen.kz tilshisi habarlady. Táýelsizdiktiń aq tańy araılap atqan jyldan beri sharýalaryn dóńgeletip, qazir óńirde belgili kásipker bolyp júrgen azamattyń biri “Taıynsha-Astyq” JShS-niń dırektory Anatolıı Rafalskıı saılaýda óz daýysyn elimizdiń bolashaǵyn alystan oılaıtyn azamatqa, ıaǵnı Elbasy Nursultan Nazarbaevqa bergenin aıtady. «Men – Qazaqstanda týyp-óstim. Osynda bilim aldym. Búginde óńirdegi iri agroqurylymdardyń  biri “Taıynsha-Astyq” jaýapkershiligi shekteýli seriktestigine basshylyq etemin. Qaramaǵymdaǵy júzdegen aýyl eńbekkerlerimen birge  aýyl sharýashylyǵymen aınalysyp kelemin», - deıdi ol. Ol qyzmet babymen jaqyn jáne alys shetelderge shyǵyp, aýyl sharýashylyǵy kásiporyndarynyń jetekshilerimen jıi kezdesetinin, mundaı basqosýlarda  ózara pikir almasyp, tájirıbe bólisetinin aıtty. «Qazaqstandyq agrarshylardyń tabystary sheteldik áriptesteriniń aldynda joǵary baǵaǵa ıe bolyp júrgeni elge jáne ondaǵy ıgilikterge degen maqtanysh sezimin uıalatady. Bul, shynynda da, úlken jetistik. Dál bizdiń eldegideı aýyl sharýashylyǵy kásiporyndaryna memleket tarapynan zor qoldaý TMD-daǵy eshbir elde joq ekendigin senimmen aıta alamyn. Joǵary sapaly aýyl sharýashylyǵy ónimderin óndirýge qaýqarymyz jetedi. Alqaptarda zamanaýı tehnıkalar  jumys atqarady. Asyltuqymdy mal basyn kóbeıtip, ekologııalyq sapaly ónimder shyǵarýdamyz», - deıdi ol. Kásipker osydan birneshe jyl buryn  sharýashylyqta Memleket basshysyn qarsy alý qurmetine ıe boldy. «Sol kezde egis tanaptaryn aralap, sút kesheninde bolyp, jurtshylyqpen jolyqqan Elbasy oblysta jáne aýdanda atqarylyp jatqan isterge oń baǵasyn bergeni  sony serpinmen jumys istep, jańa belesterdi baǵyndyrýǵa yntalandyra tústi», - deıdi Anatolıı Rafalskıı. Sondyqtan onyń aıtýynsha, bizdiń barlyq jetistikterimiz saılaýda aıqyn jeńiske jetken Elbasymen tikeleı baılanysty. Bul saılaý taǵdyrynyń tańdaýyn tanı alǵan, erik-jigeri myqty el-jurttyń kemel kelbetin kórsetti. «Nursultan Nazarbaev mereıiniń ústem bolýy qazaqstandyqtar danalyǵynyń jeńisi dep bilemin. Búkil qazaqstandyqtar, onyń ishinde,  soltústik óńir búkil álemge birliktiń, ózara túsinistiktiń, beıbitshilik pen kelisimniń, óz Otanyn qalaı súıýdiń jarqyn úlgisin pash etti. Búginde Qazaqstandy álem tanıdy.Munyń bári Prezıdentimizdiń  kóregen saıasatynyń, tuǵyrly táýelsizdigimizdiń, eńseli egemendigimizdiń  arqasy», - deıdi ol. Sonymen birge ol Qyzyljar óńiri jurtshylyǵynyń 97,71 paıyzy  tańdaýlaryn jasap,  98,33 paıyzy N. Nazarbaevty jaqtap daýys bergenin,  burynǵysynsha  joǵary azamattyq tanytqanyn, Elbasymyzdyń jaqtaýshylary ekenin dáleldegenin aıtty.  Sóziniń sońynda kásip ıesi aldaǵy ýaqytta da elimiz Elbasy Nursultan Nazarbaevtyń sarabdal basshylyǵymen kórkeıip, gúldene beretinine senimdi ekenin jasyrmady. О́mir Esqalı. Derek, sýret: egemen.kz