Atyraýdaǵy aýyrǵan jumysshylardyń dıagnozy anyqtaldy

ATYRAÝ. 28 qańtar. Atyraýdaǵy «Teńiz» kenishinde aýyrǵan jumysshylardyń dıagnozy belgili boldy. Bul týraly egemen.kz tilshisi habarlady. Buǵan deıin habarlaǵanymyzdaı, 26 qańtarda Jylyoı aýdandyq tutynýshylar quqyǵyn qorǵaý basqarmasyna «Teńizshevroıl» kompanııasynyń «Teńiz» vahtalyq qalashyǵyndaǵy klınıkasynan «Imstalkom» seriktestiginiń 2 qyzmetkeri arasynda «menıngokokkty juqpa, menıngokoksemııa» dıagnozyna kúdikti jaǵdaılar týraly jedel habarlamalar kelip túsken. Naýqastyń biri kóz jumdy. Osyǵan baılanysty quramynda oblystyq ınfeksıonıst-dáriger, epıdemıolog-dáriger, vırýsologııa jáne bakterıologııa zerthanasynyń meńgerýshileri bar brıgada qurylyp, «Teńiz» vahtalyq qalashyǵyna issaparǵa jiberilgen edi. «Epıdemıologııalyq tekserý kezinde qaıtys bolǵan adamda aýrýdyń klınıkalyq belgileri (bastyń aýrýy, tamaǵynyń aýyrsynýy, dene qyzýynyń 37,7 gradýsqa deıin joǵarylaýy) 21 qańtarda bastalǵany anyqtaldy. Naýqas medısınalyq kómekke júginbegen, óz betinshe emdelip, parasetomol, taǵy basqa dáriler qabyldaǵan. Dárigerlik kómekke júgingen kezde naýqasta júrek jumysynyń álsireýi, ókpeniń isinýi belgileri bolyp, aýyr halde bolǵan. Ekinshi naýqasta aýrý belgileri 23 qańtarda bastalǵan. Jaǵdaıy ortasha aýyr, turaqty, qazirgi kezde oblystyq juqpaly aýrýlar aýrýhanasynda em qabyldaýda. Aýrýlarmen tyǵyz qarym-qatynasta bolǵan 3 qyzmetker «Teńizshevroıl» seriktestiginiń klınıkasyna oqshaýlanyp, antıbıotıktermen profılaktıkalyq em alýda. Dıagnozdary klınıkalyq dáleldengen, laboratorııalyq zertteý juqpaly aýrýlar aýrýhanasy zerthanasynda jalǵasýda» dep habarlady Atyraý oblystyq tutynýshylar quqyǵyn qorǵaý departamenti basshysynyń orynbasary Erbolat Ýaısov. Joldasbek Shópeǵul. Derek: egemen.kz. Sýret: aikyn.kz.