BAIQOŃYR. 28 sáýir. «Qyzylorda oblysynyń jańa ınvestısııalyq strategııasy» taqyrybynda V «Baıqońyr» ınvestısııalyq forýmy ótip jatyr. Bul týraly egemen.kz tilshisi habarlady.
Forým qatysýshylary eń aldymen Baıqońyr qalasyndaǵy murajaıdy aralap kórip, «Soıýz» zymyran tasyǵyshynyń ushyrylý sátin tamashalady. Al forýmǵa 400-den asa otandyq jáne alys-jaqyn 12 shet memleketten týrıstik sala ókilderi, ulttyq kompanııa, ǵylymı-zertteý, damytý ınstıtýttary men bank sektorlary jáne memlekettik organ ókilderi aımaqtyń ınvestısııalyq múmkindigin baǵamdaý úshin bas qosty.
Forýmnyń alǵashqy kúninde Baıqońyr qalasynda «Qyzylorda oblysy týrızm salasynyń ınvestısııalyq tartymdylyǵy» taqyrybynda plenarlyq májilis ótti. Aýqymdy jıynǵa Qyzylorda oblysynyń ákimi Qyrymbek Kósherbaev, Indýstrııa jáne damý mınıstrligi týrızm ındýstrııasy departamentiniń dırektory Tımýr Dúısenǵalıev, «Báıterek» UBH» basqarma tóraǵasy Qýandyq Bıshimbaev pen elimizdiń jáne shetel ınvestorlary, kásipkerleri, qarjylyq sektor ókilderi qatysty. Jıynda alty másele qaraldy. Onda týrızm salasynyń aımaq damýyndaǵy «EKSPO-2017» kórmesiniń róli men halyqaralyq jáne Eýropa naryǵynda Qyzylorda oblysy týrızmin damytý sııaqty máseleler talqyǵa tústi.
Basqosýda sóz alǵan oblys ákimi Qyrymbek Kósherbaev týrızmdi damytý kez-kelgen aımaqtyń ekonomıkalyq ahýalyn jaqsartatyny sózsiz deı kele, barlyq forým qonaqtaryn óńirdegi týrızmdi damytýǵa shaqyrdy. «Jergilikti bılik ınvestorlardyń Qyzylorda oblysynda jumys isteýine barlyq jaǵdaı jasaýǵa daıyn», – dedi aımaq basshysy.
Shyǵys Eýropalyq «FVW Median GmbN» fondynyń marketıng boıynsha dırektory Mıroslav Ronchak Qyzylorda oblysyna týrısterdi tartý úshin eń aldymen qyzmet kórsetý salasynyń halyqaralyq standarttarǵa saı bolýy kerektigin aıtty. Sonymen qatar, sheteldikterdi qazaq halqynyń salt-dástúrimen tańdaı qaqtyrtýǵa bolady degen ol, «Germanııalyq týrısterdi Baıqońyr ǵarysh aılaǵy men Aral teńizi qyzyqtyrady. Tipti olar, Qazaqstan degen sózdi estise, eń áýeli Baıqońyrdy aýzyna alady», – dep atap ótti.
Qazaqstan týrıstik assosıasııasynyń dırektory Rashıda Shaıkenova týrısterdi arnaıy uıymdastyrylǵan sharalar arqyly da qyzyqtyrýǵa bolatynyn aıtady. Rashıda Shaıkenova Qyzylorda oblysynda Qorqyt ata kesheninde óner festıvalin, Shıeli aýdanynda «Beıbit atom kúnin», «Túıeler kerýeni» men «Qymyz» festıvalin uıymdastyrýdy usyndy.
Munan soń forýmǵa qatysýshylar «Qorqyt ata» memorıaldy keshenin aralap kórdi.
Aıta keteıik, osyǵan deıin ótkizilgen 4 ınvestısııalyq forýmnyń nátıjesinde 49 memorandýmǵa qol qoıylǵan bolatyn. Qyzylorda oblysy Eýropalyq qaıta qurý jáne Damý bankimen (EQDB) jalpy quny 63 mlrd. teńgeni quraıtyn 8 jobany júzege asyrýda.
Forýmnyń basty maqsaty sheteldik jáne otandyq ınvestorlarmen jáne ındýstrıaldy, týrıstik, agrarlyq saladaǵy kompanııalarmen ózara tıimdi yntymaqtastyq ornatý, ınvestısııalyq klımatty odan ári jaqsartyp, qarjylyq ınfraqurylymdy damytý. Forým jumysy erteń de jalǵasady. Aımaq úshin mańyzdy ondaǵan memorandýmǵa qol qoıylady dep kútilýde.
Erjan Baıtiles.
Derek, sýret: egemen.kz.
