Aqtaýda Jeńis kúni ardagerlerge vıskı men aqqaınar beriledi

AQTAÝ. 28 sáýir. Mańǵystaýda ardagerlerge beriletin merekelik azyq-túlik kárzeńkesine vıskı men aqqaınar da qosylǵan. Bul týraly lada.kz portalyna silteme jasap, egemen.kz tilshisi habarlady. Atalǵan portalǵa bul máselemen jergilikti kásipkerlerdiń biri shaǵymdanǵan. Mańǵystaý oblysynyń ákimdigi Jeńistiń 70 jyldyǵy qarsańynda Uly Otan soǵysy ardagerlerine arnalǵan azyq-túlik kárzeńkesin jasaqtaýǵa kásipkerlerdiń kómek kórsetýin ótingen. Tizimde – jemis-jıdek, shaı, shyryn, pechene, shyǵys táttilerimen birge araq, sharap, sondaı-aq, Chivas vıskıi men Asti Martini aqqaınary da bar. Osy máselege oraı memlekettiń áleýmettik qoldaýy aıasynda ardagerlerge jyl boıy barlyq kómek kórsetilip jatqanyn aıtqan Mańǵystaý oblysy ishki saıasat basqarmasy basshysynyń orynbasary Erjan Kúmisqalıev: «Jeńistiń 70 jyldyǵyna ardagerlerge syılyq jasaǵymyz keldi. Jeńis kúninde ardagerlerdiń úılerine tanystary men týystary keledi. Fronttyq júz grammǵa eshkim tyıym salǵan joq. Sondyqtan biz ardagerlerde bul kúni bári óte jaqsy bolǵanyn qaladyq», – dep túsinik bere otyryp, ol tizimniń usynystyq sıpatqa ıe ekenin atap ótken. Gúlaıym Shyntemirqyzy. Derek: lada.kz. Sýret: forum.gorod.dp.ua.