Kókshetaý qalasynda jylý elektr stansasy salynady

KО́KShETAÝ. 28 qańtar. Aqmola oblysynyń ákimi Sergeı Kýlagın men sheteldik «Peterburg Holding Company», «All Energy Holding LTD» kompanııalarynyń jáne qazaqstandyq «On Olja» jaýapkershiligi shekteýli seriktestiginiń basshylary arasyndaǵy Kókshetaý qalasynda jylý elektr ortalyǵy qurylysyn bastaý jónindegi ózara kelisimniń ekinshi raýndy ótkizildi. Bul týraly egemen.kz tilshisi habarlady. Kezdesý barysynda oblys ákimi Sergeı Kýlagın áleýetti áriptestermen jyly shyraıly áńgime bastap, jylý elektr ortalyǵy qurylysyna qatysty jobalaý-smetalyq qujattardyń daıyndalý barysymen tanysty. Ol, sondaı-aq, mańyzdy istegi kez-kelgen irkilis pen dúdámáldilik, naqty qadamdardyń aıqyndalmaýy kútkendegideı nátıje bermeıtinine ekpin túsirdi. Biz yqylas tanytyp, artyqshylyq berip otyrǵan ızraıldik kompanııanyń qazaqstandyq kásiporyndarmen, onyń ishinde qýat kózderine baı «On Olja» seriktestigimen turaqty baılanys ornatqandyǵy bolashaq tabystarymyzǵa kepildik beredi. Buǵan qosa, óńirimizdiń ınvestısııalyq tartymdylyǵy ózge salalardyń damýyna serpin berip otyrǵandyǵy tilge tıek etildi. «AN Energy Holding» kompanııasynyń qarjy dırektory Valerı Amıel senim bildirgeni úshin oblys ákimi Sergeı Kýlagınge rahmet aıtyp, jobanyń qazirgi kezeńinde bastapqy jumystardy qarjylandyrý máselesiniń sheshilgendigin atap kórsetti. Qazaqstan jaǵynan kásibı mamandardyń jumyldyrylýy JEO qurylysynyń tehnıkalyq jáne strategııalyq máselelerin sheshýge múmkindik beretinin aıtqan ızraıldik kompanııa ókili kelesi kezdesýde oblys basshylyǵyna ınvestısııalyq jobanyń daıyn nusqasy tanystyrylatynyn málimdedi. Baqbergen Amalbek. Derek: egemen.kz. Sýret: egemen.kz.