On eki apta boıy qatysýshylar halyqaralyq sarapshylarmen tájirıbe almasyp, masshtabtaý strategııalaryn ázirledi. Olarǵa tegin turǵyn úı men keńse bólmeleri usynyldy. Naryqtaǵy bedelderin nyǵaıtý úshin vorkshoptar, mentorlyq qoldaý múmkindikteri berilip, startaptardyń ınnovasııalyq bıznes modelderin damytýǵa yqpal etti. Sonymen qatar baǵdarlama aıasynda iri halyqaralyq kompanııalarmen mańyzdy kelisimder jasaldy.
«Google for Startups»-pen yntymaqtastyq ornatqan 3 jyl ishinde Ortalyq Azııa elderinen 62 startap akselerasııa baǵdarlamasynan súrinbeı ótti. Aldyńǵy lek túlekteri 26 mln dollardan astam ınvestısııa tartty, al bul kompanııalardyń jalpy baǵasy 425 mln dollardy qurady. Olar BAÁ, Túrkııa, AQSh jáne basqa elderdiń naryǵyna shyǵa aldy. Bul seriktestik startaptarymyz úshin halyqaralyq alańǵa jol ashyp, jahandyq naryqty baǵyndyrýǵa berik negiz bolatynyna senimdimiz. Biz startap-ekojúıesin damytý maqsatynda álemdik jetekshi kompanııalarmen yntymaqtastyqty nyǵaıta beremiz», dedi Astana Hub bas dırektory Maǵjan Mádıev.
Besinshi lek qatysýshylary óz jobalary men jetistikterin «Demo Day» is-sharasynda tanystyrdy. Baǵdarlamanyń jarqyn jetistiginiń biri shaǵyn jáne orta bıznesti sıfrlandyrýmen aınalysatyn «Beksar» startaby boldy. Akselerator barysynda kompanııa kirisin 3 ese arttyryp, MRR kórsetkishin 75 000 dollarǵa jetkizgen.
«Silkway Accelerator» baǵdarlamasyna qatysqanymyz qarjylyq kórsetkishimizdi jáne operasııalyq úderisimizdi edáýir jaqsartty. Sondaı-aq tutynýshylardyń ketýin 70%-ǵa qysqarttyq, bul sapany baqylaý júıesin engizý arqyly júzege asty. Baǵdarlama aıasynda masshtabtaý strategııasyn naqtylap, О́zbekstan men Qyrǵyzstanda ókildikter ashtyq. Buǵan qosa Ortalyq Azııa, Ázerbaıjan jáne Grýzııa naryqtaryn ári qaraıǵy damý baǵyty retinde tańdadyq», dedi «Beksar» kompanııasynyń negizin teń qalaýshy Maqsat Bektibaev.
Al «Checkdoc.kz» startaby aı saıynǵy kirisin 20 ese arttyryp, 46 mıllıon teńgege kelisimsharttar jasasty. «Biz komanda quramyn qaıta jasaqtap, ony negizgi mamandarmen bekite tústik. B2B naryǵyna shyǵyp, medısına men saqtandyrý salasynda iri kelisimderge qol qoıdyq. Sondaı-aq jaqyn arada «Checkdoc Digital Insurance» atty jańa ónimdi iske qosýdy josparlap otyrmyz, bul qyzmetkerlerge saqtandyrý qyzmetterin jedel basqarýǵa múmkindik beredi», dedi jobanyń bas dırektory Aqtoty Smatova.
Akselerasııany sátti támamdaǵandar qatarynda birneshe otandyq joba bar. Atap aıtsaq, mektep oqýshylaryna arnalǵan oqytý platformasy «ab.ai»; alaqannyń kómegimen avtorızasııadan ótýge, kez kelgen jerge kirýge jáne túrli zatqa tólem jasaýǵa múmkindik beretin «Alaqan» jobasy; júk tasymaldaýdy ekspedıtorlaý boıynsha eń iri onlaın-platforma «biny.co»; jasandy ıntellektini qoldana otyryp, onlaın kýrstar usynatyn «Courstore SaaS»; marketpleısterde satý úderisin avtomattandyrýǵa arnalǵan «Prometei»; kásiptik baǵdar berýge jáne ýnıversıtetke túsýge arnalǵan JI negizindegi «WeGlobal.ai» platformasy; sondaı-aq meıramhanaǵa arnalǵan tapsyrystar men tólemderdi basqaratyn «kook» jobasy bar.
Halyqaralyq qatysýshylar qatarynda Mońǵolııa memleketiniń jobasy kósh bastady. Atap aıtsaq, «Lambda Global» kompanııasy qashyqta jumys isteıtin mamandarmen yntymaqtastyq ornatýǵa arnalǵan platforma qurdy. Sondaı-aq Qyrǵyzstannyń JI negizindegi baǵdarlamashylarǵa arnalǵan jumys sımýlıatory «Neobis» boldy. Budan bólek, ózbekstandyq eki startap erekshe kózge tústi. Sonyń biri – «AL-Chiroq». Bul – uıaly baılanys operatorynyń baǵdarlamalaryna arnalǵan platforma. Ekinshisi – jyljymaıtyn múlik ındýstrııasyna baǵyttalǵan sıfrlyq ekojúıeni usynatyn «UYSOT» kompanııasy.
Júzden júırik dep tanylǵan startap ıeleri óz jobalaryn tanystyryp, aldaǵy josparlaryn talqylaǵan dástúrli «Opening Day» is-sharasyna Sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev qatysqan edi.
«Kásipkerler men startaptarǵa arnalǵan mundaı aýqymdy ári mańyzdy bastama úshin seriktesterimiz ben «Google for Startups» kompanııasyna alǵys aıtqym keledi. Baǵdarlamanyń jetistikteri barshylyq. Atap aıtsaq, 1 300-den astam jedel iske qosylǵan joba, 400 mıllıon dollardan astam somaǵa baǵalanǵan 50-ge jýyq startap, sondaı-aq qatysýshylar tartqan 26 mıllıon dollar kólemindegi ortaq ınvestısııa. Bul – atalǵan baǵdarlamanyń aýyz toltyryp aıtarlyqtaı úlken nátıjesi ári bastamasy ǵana. Mınıstrlik tarapynan mundaı jobalarǵa qoldaý kórsetip, uıymdastyrýǵa qajetti barlyq ınfraqurylymdy qamtamasyz etýge daıynbyz», dedi mınıstr.
«Silkway Accelerator» birlesken baǵdarlamasynyń tıimdiligi men ónimdiligin eskere otyryp, «Google for Startups Astana Hub»-pen seriktestigin jalǵastyrady. Aıta keteıik, «Google for Startups» – 2011 jyly «Google» korporasııasy iske qosqan startap baǵdarlamasy. Bul 125 eldegi 50-den astam akseleratordy qamtyp, tehnologııalyq kásipkerlerge tájirıbe sabaqtaryn usynady.
