«Sosıalıstik Qazaqstan» sarbazynyń aty

Ońtústik Qazaqstandaǵy orta mektepke berildi Burnaǵy kúni Qazaqstan Respýblıkasy Úkimetiniń qaýlysymen elimizdegi birqatar mektepterge Keńes Odaǵynyń Batyrlary men Uly Otan soǵysy ardagerleriniń esimderi berildi. «Qazaqstan Respýblıkasynyń ákim­shilik-aýmaqtyq qurylysy týraly» Zańyna sáıkes qabyldanǵan qaýly Qostanaı, Qyzylorda, Pavlodar, Ońtús­­tik Qazaqstan jáne Shyǵys Qazaq­stan oblystaryndaǵy birshama bilim meke­melerin qamtydy. Solardyń qataryndaǵy Ońtústik Qazaqstan oblysy Ordabasy aýdandyq bilim bóliminiń «Shubarsý jalpy orta mektebi» kommýnaldyq memlekettik mekemesi budan bylaı «Muhametqul Islamqulov atyndaǵy jalpy orta mektep» kommýnaldyq memlekettik mekemesi dep atalatyn boldy. Uly Otan soǵysynda ataqty №8 gvardııalyq-panfılovshylar dıvızııasy quramynda batalon komandıri retinde shaıqasqan Muhametqul Islamqulov maıdan dalasyna respýblıkalyq «Sosıalıstik Qazaqstan» gazetiniń qyzmetkeri bolyp júrgen kezinde, 1941 jyldyń tamyz aıynda attanǵan edi. Sol jylǵy kúz ben kelesi jyldyń qysy aralyǵynda Máskeýdi basqynshy jaýdan qorǵaý úshin bolǵan qandy qyrǵynǵa bastan-aıaq qatysqan jýrnalıst-jaýynger 1942 jyldyń aqpan aıynda kezekti shaıqas barysynda erlikpen qaza tapty. Osy aılarda kórsetken eren erlikteri úshin ol birneshe ret Keńes Odaǵynyń Batyry ataǵyna da usynylǵan eken. Biraq, shyqqan tegi el bılegen baı-bolys bolǵandyqtan, oǵan bul qurmetti ataq berilmeı qalǵan. Gazetimizdiń ústimizdegi jylǵy 21 naý­ryzdaǵy nómirinde baıyrǵy qalamger týraly «Soǵysqa «Sosıalıstik Qazaqstannan» attanǵan» degen ocherk jarııalandy. Onda esil erdiń eki jarym aıǵa sozylǵan joryq joldarynda kórsetken kózsiz erlikteri birshama sóz boldy. Endi, mine, halqynyń kóńili men jadynda jaýjúrek batyr retinde máńgi qalǵan abzal aǵanyń esimimen onyń týyp-ósken ólkesinde óskeleń urpaqty otanshyldyqqa tárbıeleıtin bilim mekeni atalyp otyr. Bul barsha jýrnalıster qaýymy úshin qýanyshty oqıǵa dep bilemiz. Rýslan IGILIK.