Janbaıdaǵy jarasymdy is

Uly Jeńistiń 70 jyldyǵyna oraılastyryla ótkizilip jatqan úlkendi-kishili qandaı da sharanyń mán-mazmuny erekshe. Jýyrda Janbaı aýylyndaǵy Hamıdolla  Náýbetov atyndaǵy orta mektepte «Ustaz ulaǵaty – ómir muraty» taqyrybynda ótip, bar sanaly ǵumyryn halyq aǵartý salasyna arnaǵan ulaǵatty ustaz, soǵys jáne eńbek ardageri Berjanov Berdesh atyndaǵy ana tili kabınetiniń ashylý saltanaty da osynaý mereıli merekege arnaldy. Bul buǵan deıin de biri – Uly Otan soǵysy jyldarynda qanquıly jaýmen alysyp, biri tylda ter tókken, atalǵan bilim ordasynda uzaq jyldar boıǵy ulaǵatty qyzmetimen jas urpaqqa bilim nárin berip, úlken ómirge qanat qaqqyzǵan Nasyr Nurmashev, Aıapbergen Panaberdıev, Shapaǵat Ábilov syndy búginde bul ómirde joq ustazdarǵa geografııa, orys tili, tarıh kabınetterine esimderin berý arqyly el jadynda eńbekterin jańǵyrtyp, ónegeli ómirlerin jas urpaqqa taǵylym qylýdy maqsat tutýdan týyndaǵan ıgilikti bastamanyń jarasymdy jalǵasy desek bolady. Aýyldaǵy saz mektebiniń ult aspaptar orkestriniń oryndaýyndaǵy jáne súıemeldeýindegi án-kúılermen tyńdaýshylaryn tánti etip, keshtiń ón boıyna keıipkerdiń ómir jolynan órilgen beınebaıanmen órnektelip otyrǵan máni zor, mazmuny tereń  basqosýda ózge de bilim oshaqtaryna úlgi bolarlyq osynaý istiń uıytqysy bolyp júrgen mektep dırektory Ǵımadı Jıenǵazıev ardager ustazdyń ómiri, eńbek joldary týraly tartymdy baıandama jasady. 1916 jyly dúnıege kelip, qyryq jyldaı mektepterde muǵalimdik, basshylyq jumystar atqarǵan, onyń sońǵy on alty jylynda ol kezde Kýıbyshev atyndaǵy orta mektep atalǵan atalmysh bilim uıasynda ter tókken Berdesh Berjanulynyń tórt jylǵa jýyq ómiri maıdandaǵy joryq joldarynda ótti. 1942 jyldyń qańtarynda áskerge alynyp, Stalıngrad, Voronej maıdandarynda nemis-fashıst basqynshylaryna qarsy soǵysqan ol aldyńǵy shepte pýlemetshi boldy. Eki márte jaý oǵynan jaralanǵan jaýynger emdelip shyǵysymen qaıta sapqa turyp, zapastaǵy atqyshtar polkine, keıin sheptegi quramaǵa alynyp, 1945 jyldyń qazanyna deıin Lıtva, Latvııa, Estonııa elderin jaýdan tazartýǵa atsalysyp, Jeńisti Latvııada qarsy alyp, elge oralǵan. Maıdanger ustaz jary Qanzıla Sydyqqyzy ekeýi jarty ǵasyrdan astam juptasqan ómirlerinde dúnıege kelgen on perzentke tálimdi tárbıe bergen ónegeli otbasy ıeleri atandy. Saltanatty sharada B.Berjanulynyń ustazdyq tulǵasy, adamı bolmysy týraly aýdan ákiminiń orynbasary Mádı О́teǵalıev, aýdandyq bilim bóliminiń basshysy Baqbergen Qarabaev, aýyldyq okrýg ákimshiliginiń bas mamany Adaıbek Esekesh, birge jumys jasaǵan áriptesi Zakarııa Jumaǵazıev, shákirtteri atynan Shárbaný Nasyrqyzy tolǵanysty lebizderin toǵystyrdy. Al áýlet atynan sóz alǵan Bekeńniń inisi Amangeldi Berjanov pen onyń zaıyby, belgili aıtys aqyny Jánıba Qarasaeva, uly Jaınarbek ıgi iske uıytqy bolǵan mektep ujymy men ákimshiligine rızashylyq sezimderin bildirdi, mekteptiń eń úzdik úsh oqýshysyna oqý jyly qorytyndysymen dástúrli stıpendııa taǵaıyndaý jónindegi nıetterin jetkizdi. Eki bólimnen turatyn sharanyń sońǵysy «Berjanov Berdesh atyndaǵy ana tili kabınetiniń» ashylýyna arnalyp, lentasy qıyldy, maıdanger urpaqtarynyń demeýshiligimen jabdyqtalyp, kórnekiliktermen ásem bezendirilgen synypta shákirtterdiń alańsyz bilim nárimen sýsyndaýyna múmkindik mol. Jolaman DÁÝLETIIаR. Atyraý oblysy, Isataı aýdany.