Jeńisti jaqyndatqandar

Uly Otan soǵysyndaǵy qazaqstandyq jaýyngerlerdiń Otanǵa degen súıispenshiligi, eline degen mahabbaty bolashaq beıbit ómir úshin erlikke bastady. Olardyń esimi qazirgi urpaqtyń esinde máńgi saqtalady. Sol bir surapyl soǵysqa meniń de ákem Almaty oblysy, Balqash aýdanynan Sheńgelbaı Bákenov jáne anam Jamal Inebekovanyń baýyrlary da attanǵan edi. Ákem soǵysta mergen-atqysh bolyp, birneshe jaýyngerlik tapsyrmalardy abyroımen oryndap, I dárejeli «Dańq» ordenimen marapattalǵan jáne «Berlındi alǵany úshin» medalimen marapattalǵan. Qazaqstandyq jaýyngerlerdiń qatarynda ákem Sheńgelbaı Uly Jeńiske óz úlesin qosyp, Berlınge deıin jetip, Reıhstagtyń aldynda ótken Jeńis paradyna qatysyp, keıin Japonııanyń Kvantýn armııasyn talqandaýǵa da óz úlesin qosqan erjúrek jaýynger. Sondaı-aq, Uly Jeńiske zor úlesin qosqan tyldaǵy eńbekti aıtpasqa bolmaıdy. Qarttarymyz ben analarymyz, jas balaǵa deıin kúndiz-túni eńbek etip, maıdandaǵy jaýyngerlerdi oq-dárimen, azyq-túlikpen, kıim-keshekpen qamtamasyz etip otyrdy. Meniń anam Jamal Inebekova eki tildi birdeı meńgergen saýatty adam bolǵan. Soǵys bastalǵanda anam 18 jasta eken. Jas bolsa da tyldaǵy eńbekke belsene qatysyp, komsomol komıtetiniń hatshysy, esepshi, baılanys júıesiniń qyzmetin atqaryp, aýdan men kolhoz arasyndaǵy kúndelikti eńbek maıdanyndaǵy málimetterdi júıelep, aýdanǵa esep berip otyrǵan. Taǵy da basqa qyzmetter atqara otyryp, Uly Jeńiske ózindik úlesin qosqan. Anam Jamal Inebekova 1947 jyly SSSR Joǵarǵy Sovetiniń buıryǵymen «1941-1945 jyldardaǵy Uly Otan soǵysyndaǵy erlik eńbegi úshin» medalimen marapattalǵan. Qazaqstan halqy soǵys jyldarynda basyna túsken qıynshylyqtardy kótere bildi. Olar keskilesken shaıqastaǵy erlikte, tyldaǵy eńbekte qarapaıymdylyq pen ulylyqtyń ónegesin kórsetti. Birlik pen tatýlyq bar jerde alynbaıtyn qamal joq ekenin dáleldedi. Jibek BÁKENOVA, orta mektep-gımnazııa muǵalimi. Qapshaǵaı.