Sýretti túsirgen – Erlan OMAR, «EQ»
Saltanatty is-sharaǵa Qorǵanys mınıstri Rýslan Jaqsylyqov, Aqmola oblysynyń ákimi Marat Ahmetjanov, Raqymjan Qoshqarbaevtyń qyzy Álııa Raqymjanqyzy, Halyq qaharmany, otstavkadaǵy armııa generaly Muhtar Altynbaev, Halyq qaharmany, otstavkadaǵy general-leıtenant Baqytjan Ertaev, «Qazaqstan ardagerleri» qaýymdastyǵynyń tóraǵasy, aýǵan soǵysynyń ardageri Baqytbek Smaǵul, t.b. qonaqtar qatysyp, sóz sóıledi.
Olar Prezıdent Qasym-Jomart Toqaevtyń uıytqy bolýymen bıyl týǵanyna 100 jyl tolyp otyrǵan dańqty batyrlarymyz R.Qoshqarbaev pen S.Nurmaǵambetovtiń mereıtoıy keń kólemde toılanyp jatqanyn, sondaı-aq «Aıbyn» ordeniniń úsh dárejesine B.Momyshuly, S.Nurmaǵambetov jáne R.Qoshqarbaevtyń esimderi berilgenin atap ótti.
«Bul – kópten kútken mereıli sát. Raqymjan Qoshqarbaev atyndaǵy saıabaq taıtóbelikter men aýyl qonaqtarynyń súıikti demalys ornyna aınalady dep senemiz. Mundaı qoǵamdyq oryndar jas jetkinshekterimizge tarıhtan tálim berip qana qoımaı, olardy el qorǵaıtyn batyr qylyp tárbıeleýge óz úlesin qospaq», dedi oblys ákimi M.Ahmetjanov.
Á.Raqymjanqyzy ákesiniń mereıtoıyn ótkizýge memleket tarapynan aıryqsha kóńil bólinip jatqanyna Prezıdentke, oblys jáne Qorǵanys mınıstrligi basshylaryna alǵysyn jetkizdi.
«Ákemniń balalyq shaǵy osy aýylda ótti. Bul jer – biz úshin ystyq meken. Búgingi saıabaqtyń da Taıtóbeniń tórinen ashylýy – zańdylyq. Osy ıgilikti istiń basy-qasynda bolyp, júzege asýyna atsalysqan barlyq janǵa rahmet aıtqym keledi», dep ol júrekjardy lebizin jetkizdi.
Qosshy qalalyq ákimdigi bergen málimetke qaraǵanda, 1 200 sharshy metr aýdandy alyp jatqan saıabaq pen bıýst jumysyna 70 mln teńge qarajat jumsalǵan. Ishinde 8 oryndyq ornatylyp, búkil aýmaǵyna tas tósenish tóselgen. Aınalasyna qaraǵaı aǵashtary ornatylyp, qorshalǵan. Saıabaq aýmaǵy tolyqtaı jaryqtandyrylǵan. Bul aýyl turǵyndary men qonaqtaryna tek kúndiz emes, qarańǵy ýaqytta da saıabaqta serýendeýine múmkindik beredi.
Saltanatty is-shara kezinde saıabaq janynda qarý-jaraq pen áskerı tehnıkalar kórmesi uıymdastyrylyp, kelýshilerge sarbaz botqasy usynyldy.
Sonymen qatar batyrdyń 100 jyldyǵyna oraı elordadaǵy Ulttyq qorǵanys ýnıversıtetinde «Reıhstagqa tý tikken Raqymjan Qoshqarbaev» atty vedomstvoaralyq ǵylymı-tájirıbelik konferensııa ótti. Oǵan Qarýly kúshterdiń, basqa da áskerı qurylymdardyń ókilderi, professor-oqytýshylar quramy, joǵary oqý ornynyń magıstranttary men doktoranttary, tarıhshylar, ardagerler jáne Raqymjan Qoshqarbaevtyń týystary qatysty.
Aıta ketsek, 1945 jyly batyr jerlesimiz nebári 20 jasta edi. Onyń ómir joly men jasaǵan erligi – búgingi urpaqqa úlgi-ónege. Jıynda otstavkadaǵy general-leıtenant Abaı Tasbolatov Raqymjan Qoshqarbaevty «fenomen» dep atady. Ol óziniń ómirlik ustanymy – qarapaıymdylyǵymen, eńbekqorlyǵymen, senip tapsyrylǵan iske jaýapkershiligimen úlgi bola bildi. Ýaqyt bárine synshy, qaharman da tarıhtan óz ornyn aldy.
Batyrdyń mereıtoıyna arnalǵan taǵy bir is-shara elordadaǵy R.Qoshqarbaev atyndaǵy №44 mektepte ótti. Oǵan Qorǵanys mınıstrligi Tárbıe jáne ıdeologııalyq jumys departamenti basqarmasynyń bastyǵy, polkovnık Serǵalı Álimqulov, «Amanat» partııasynyń ókilderi, Aýǵan soǵysynyń ardagerleri, muǵalimder men oqýshylar qatysty.
«Bıyl mamyr aıynda Qorǵanys mınıstriniń usynysymen bul mektepke Raqymjan Qoshqarbaevtyń esimi berildi. Ataýly kúnge oraı mınıstrlik is-sharalar keshenin uıymdastyryp, barlyq oqý ornynda Erlik sabaqtary ótip jatyr. Bolashaq Otan qorǵaýshylarǵa ómir joly úlgi bolatyn R.Qoshqarbaevtyń erligi týraly aıtyldy», dep atap ótti polkovnık S.Álimqulov.
