Respýblıka kúni qarsańynda uıymdastyrylǵan aksııa aıasynda senatorlar Turan dańǵyly, Dinmuhamed Qonaev, Qabanbaı batyr jáne Dostyq kósheleriniń arasynda ornalasqan saıabaqta kógaldandyrý jumystaryn júrgizdi. Igilikti iske depýtattar men palata apparatynyń qyzmetkerlerine qosa, Senat janyndaǵy sarapshylar klýbynyń músheleri, elordanyń tazalyǵyn kózdeıtin bastamalarǵa únemi óz úlesin qosyp júrgen Taldaý mektebiniń túlekteri de atsalysty. Is-sharaǵa barlyǵy 100-ge jýyq adam qatysyp, olar alma aǵashynyń jáne moıyl, yrǵaı sııaqty buta jemisteriniń 200 kóshetin ekti.
«Prezıdentimiz Qasym-Jomart Toqaevtyń bastamasymen elimiz boıynsha ótkizilip jatqan «Taza Qazaqstan» jalpyulttyq ekologııalyq aksııasy barsha azamatty ortaq iske jumyldyryp otyr. Bul – birrettik is-shara emes. Mundaı bastama – elimizde ekomádenıetti qalyptastyrýǵa jáne jańa qoǵamdyq etıka men patrıotızmdi nyǵaıtýǵa tyń serpin beretin júıeli jumys. Osyndaı naqty ister qorshaǵan ortaǵa qamqorlyqpen qaraýdy ár adam úshin kúndelikti normaǵa aınaldyrýǵa jol ashady», dedi Senat tóraǵasy Máýlen Áshimbaev.
Sondaı-aq palata spıkeri Memleket basshysy bıylǵy Joldaýynda qorshaǵan ortaǵa uqyppen qaraýdy odan ári damytýdyń mańyzdy ekenine basa mán bergenin aıtty. Sondyqtan qazirgi tańda tabıǵatty aıalaý jáne ekologııalyq jaýapkershilik qaǵıdattary kún tártibindegi ózekti máselelerdiń birine aınalyp otyr.
