Foto: Oblys ákimdigi
Aýtızmi jáne basqa da oı-sana kinárattary bar balalarǵa arnalǵan mekeme jyl saıyn 125 erekshe balany aqysyz qabyldaıdy. Ol Aqtóbe qalasy Sáńkibaı batyr dańǵyly №171B mekenjaıynda ornalasqan.
Ortalyqty Respýblıka kúni qarsańynda oblys ákimdigi, «Samuryq-Qazyna», «Qazaqstan halqyna» «Qamqorlyq» qorlarymen birlese iske qosty.
«Respýblıka kúni qarsańynda, mentaldy buzýshylyqtary bar balalarǵa arnaýly áleýmettik qyzmetter kórsetetin memlekettik mekeme ashyp otyrmyz. Oblysta 18 jasqa deıingi mentaldy buzýshylyqtary bar 635 múgedek bala esepte tur. Búgin ashylatyn ortalyqtyń mamandary balalar men olardyń otbasylaryna nátıjeli kómek alýǵa jaǵdaılar jasaıdy. Jyl saıyn 50-den 100 balaǵa deıin keshendi qyzmetter kórsetiledi», dedi óńir basshysy Ashat Shaharov.
Bolashaqta jasóspirimder ózderin qamtamasyz etý úshin aǵash ustasy, qysh jáne tigin sheberhanalarynda sabaqtar qarastyrylǵan. Sondaı-aq, ortalyqta vızýaldy baılanys ornatýda qıyndyqtary bar balalar úshin robototerapııa qoldanylady, onda balalar robottarmen ózara qarym-qatynas jasaýdy úırenedi. Sonymen qatar, legoterapııa, robototehnıka, art-terapııa jáne mýzykalyq terapııa sabaqtary balalardyń damýyna ǵana emes, áleýmettenýine, qoǵamǵa enýine jáne tolyqqandy ómir súrýine septigin tıgizedi.
Aıta ketsek, atalǵan ortalyqtan bólek, «Samuryq-Qazyna» AQ kompanııalary tobynyń biryńǵaı qaıyrymdylyq operatory – «Samruk-Kazyna Trust» qorynyń qarjylandyrýymen ońaltý jáne erte aralasý ortalyqtary jumys istep, árqaısysy jylyna 600 balany qamtyp otyr. Búginde 1994 bala qabyldanyp, 153-i táı-táılap alǵashqy qadamyn bassa, al 331-i alǵashqy sózin aıtqan.«Erekshe bala asyrap otyrǵan ár ata-ana úshin mundaı ortalyqtardyń mańyzy zor. Bizdiń maqsatymyz – eldiń barlyq óńirin qamtı otyryp, erekshe balalardy jaqyn jerden qoljetimdi ári tıimdi ońaltýmen qamtamasyz etý», dedi «Samuryq-Qazyna» AQ korporatıvtik basqarý, áleýmettik-eńbek qatynastary jáne eńbekti qorǵaý jónindegi basqarýshy dırektory Ǵıbrat Aýǵanov.
