Qazaqstan men Marokko Koroldigi arasyndaǵy dıplomatııalyq qatynastar 1992 jylǵy 26 mamyrda ornaǵan edi. Al Qazaqstan elshiligi 2020 jyly ashyldy.
Qazaq mýzykasynyń úzdik úlgilerinen turatyn konsert baǵdarlamasy Marokko jurtshylyǵyn elimizdiń ejelgi tarıhymen de, onyń zamanaýı mádenıetimen de tanystyrýǵa arnalǵan.
«Joshy» etno-folklorlyq ansambli qazaq halqynyń ótkeni men Uly dalanyń ejelgi rýhyn beıneleıtin «Alash urany», «Rýhty el», «Jolbarystyń jortýy» atty avtorlyq aspaptyq shyǵarmalaryn kópshilik nazaryna usyndy.
Al «Alem» zamanaýı horeografııa baleti biregeı halyq bıin kórsetti. Qazaqtyń dástúrli ánin fılarmonııanyń daryndy oryndaýshylary Jaqsykeldi Maıasarov, Rahat Begasylov, Zınat Qasymova, Mádenıet salasynyń úzdigi Danııar Muqan oryndady.
Akademııalyq án bóliminiń oryndaýshylary Altynbek Arystanbek pen Fırýza Rahmetova Mádenıet salasynyń úzdigi Roza Shotqalıevanyń súıemeldeýimen halyq ánderinen klassıkalyq arııalarǵa deıingi keń repertýardy, minsiz daýys pen sheberlikti kórsetti. Sondaı-aq Qazaqstannyń eńbek sińirgen qaıratkeri Aıgúl Qosanova marokkolyq kórermendi daýys dıapazonymen jáne janǵa jaqyn dala balladalarymen tańǵaldyrdy.
Halyqaralyq baıqaýlardyń laýreaty, skrıpkashy Maııa Medetbek Vanessa Meıdiń «Arabian girl» shyǵarmasyn oryndap, arab mádenıetine qurmet kórsetti. Mýzykalyq keshtiń tolqyndy sáti – Ákimhan Májenov pen Rabattyń Úlken orkestriniń marokkolyq «Mahla ifrane» halyq ánin oryndaýy boldy.
Kesh sońynda Aıgúl Qosanovanyń, «Alem» zamanaýı horeografııa baleti men Rabattyń Úlken orkestriniń ónerin úılestirgen Q.Sarın men H.Rızabektiń «Baqytty meken» áni oryndaldy.
Qazaqstan men Marokko Koroldigin jaqyndastyratyn ortaq tustar kóp – ǵajaıyp landshaftar, ata-babalardyń kóshpeli ómir salty, dini, ekonomıkalyq baılanystary jáne ekijaqty baılanysty damytýǵa degen zor umtylys. Elordalyq ónerpazdar kórsetken mádenıet merekesi osy bir abyroıly maqsatqa úles qosqany anyq. Eki qurlyq, eki ejelgi órkenıet arasyndaǵy mádenı kópir aldaǵy ýaqytta jalǵasa beretini sózsiz.
