El táýelsizdigi jarııalanatyn jyly ómir esigin ashqan Merýert Ashanbekqyzy Jambyl oblysynyń Qordaı aýdanyna qarasty Betqaınar aýylynda mektep tabaldyryǵyn attaıdy. Shaǵyn ǵana aýylda týyp-ósken onyń boıynda týǵan jerge degen súıispenshilik, Otanǵa degen mahabbat adal qyzmet etýden bastalatyny bala kúnnen bastap sanasyna quıylady. Sebebi ákesi adal eńbek etip, aýyl sharýashylyǵymen aınalysqan. Anasy aýyldyń ákimshiliginde zeınet jasyna jetkende taban aýdarmaı qyzmet etti. Otbasynda eńbektiń nany tátti bolatynyn túsinip ósken ol da bastaýysh synyp pedagogıkasy men psıhologııasy mamandyǵyna oqýǵa túsedi.
«Bala kúnimde aýyrǵan adamdarǵa kómektesetin dáriger bolýdy armandaýshy edim. Biraq úlkenderdiń baǵyt-baǵdar berýimen ómir jolymdy ustazdyqqa burdym. Sóıtip muǵalim mamandyǵyn tańdap, bilimdi urpaq tárbıeleý jolynda tálim aldym. Biraq meniń ómirlik maqsatym sol, bir orynda turyp qalǵym kelmeıdi. Jetistikterge jetý jolynda únemi ilgerileýdi, alǵa jyljýdy qalaımyn. Qoǵamdaǵy ádildiktiń ornaýy men quqyq buzýshylardyń jaýapkershilik arqalap, tártip ornatýǵa tamshydaı úlesimdi tıgizgim keletinin túsindim. Sondyqtan osy salaǵa keldim. Áskerge deıin aýdandyq ákimshilikte de qyzmet ettim», deıdi ol.
Azamattyq ómirge qaraǵanda qyzyǵy men shyjyǵy kóp, temirdeı tártipke baǵyttalǵan bul sala burymdynyń boıyndaǵy adamgershilik qasıetterdi molaıtyp, jaýapkershiliktiń júgi aýyr ekenin túsindirgen.
«Kez kelgen salada qyzmet etsem de, ómirlik ustazym – ata-anam. Olardyń bala kúni aıtqan árbir sózi qııalyma qanat bitirse, kúni búginge deıin sol ákemniń aıtqan árbir aqyly ómirlik azyǵyma aınalyp jatyr. Taǵdyrdyń ár salǵan synaǵyna kezikken saıyn áke sózine súıenip, áreket etemin. Al meniń boıymdaǵy náziktik anamnyń úlgi-ónegesi der edim. Sol sekildi adam ómirindegi ár kezeńde ártúrli adamdy, ártúrli ustazdy kezdestire alady. Áskerı ortaǵa kelgende meniń boıymdy tiktep, kásibı qabiletimdi kórsetýime demeý bildirgen ofıserler de joq emes. Olardy da ómirdiń bir kezeńinde ustazdyq etken adam retinde tanystyra alamyn. Mysaly, bizdiń áskerı bólim komandıriniń tárbıe jáne áleýmettik quqyqtyq jumystar jónindegi orynbasary, podpolkovnık Baýyrjan Qanseıitov – temirdeı tártip ornyqqan ortada qalaı qyzmet atqarý kerektigin úıretýden jalyqpaǵan jan. Onyń mol tájirıbesi men qol astyndaǵy ár qarýlasyna degen janashyrlyǵy áskerı qyzmetshiniń kásibı biliktiligin kórsetýge dem beredi», dep aǵynan jaryldy ol.
Qazir Ulttyq ulannyń áskerı bólimine kitaphanashy bolyp taǵaıyndalǵan ol «janyma jaqyn kásibı ortamdy tapqandaı boldym» deıdi. Onyń kúndelikti jumysyna sarbazdarmen erkin suhbat júrgizý, ónerlerin shyńdap, ózderiniń shyǵarmashylyq qabiletterin damytýǵa atsalysý kiredi. Bile bilgen adamǵa adam boıyndaǵy qabiletti oıatyp, shyǵarmashylyǵyn shyńdaý – jaýapty mindet.
«Olardyń qyzyǵýshylyqtaryn óshirip almaı, kerisinshe durys baǵyt-baǵdar kórsetýdi ózimniń paryzym sııaqty sezinemin. Sarbazdarmen óte kóp jáne qyzyqty is-sharalar ótkizýge tyrysamyz. Bizdiń sarbazdar oblystyq jáne qalalyq kitaphanalarda ótetin vıktorınalarǵa, merekelik is-sharalarǵa jıi qatysady. Demalys jáne mereke kúnderi bizde únemi ónerli sarbazdar jarysy bolady. Konsert jáne kóńildi tapqyrlar saıystaryn uıymdastyramyz. Qazirgi jastardyń boıyndaǵy jalyndy óshirip almaı, durys joldy kórsetip, durys baǵyt bere alsaq, olardyń árqaısysy ómirlik jolyn taýyp keterine kúmánim joq», deıdi M.Choraeva.
Jumysta sarbazdardyń qabiletin shyńdaıtyn ol óz otbasyndaǵy meıirimdi ana rólin de eshqashan umyt qaldyrmaıdy. Sebebi bizdiń keıipker Otanǵa adal qyzmet etýdiń úlgisi otbasyndaǵy tatýlyqtan bastalatynyn aıtady.
«Bes balam bar. Balalarym – baılyǵym. Úsh ulym jáne eki qyzym bar. Tuńǵysh ulym 8-synypta oqıdy. Anasynyń jolyn qýyp sport áleminde de baq synap keledi. Bokstan túrli jarystyń júldegeri, mýzyka salasynda da az-maz jetistikteri bar. Ulymnan keıin egiz qyzym dúnıege keldi. Qos arýym, názik gúlderim 4-synypta oqıdy. Qol tıgende birge kitap oqımyz, otbasy bolyp mýzykamen shuǵyldanamyz. Odan keıingi balalarym da – egiz. Kenjemniń ekeýi de – ul. Kishkentaı qorǵaýshylarym bıyl 1-synypqa qadam basty. Olardy da sportqa jaqyn ustaımyn. Ekeýi de karatemen shuǵyldanady. Kórsetkishteri jaqsy, qatarlastary arasynda júldeli oryn alyp júr. Ana baqyty degen osy eken. О́zimdi erekshe baqytty sezinemin», deıdi ol.
Jalǵyzilikti kópbalaly ananyń qaýyrt qyzmeti otbasyndaǵy bala tárbıesine eshqandaı syltaý bola almaıtyny osyny kórsetse kerek. Tipti bes balasynyń ózine tán minez-qulyqtaryna deıin jaqsy biledi eken. Sóz arasynda ózin bes memleketpen jumys atqaryp júrgen dıplomat sekildi sezinetinin aıtyp ázildep te aldy.
«Balalarymnan analyq mahabbatymdy aıamaımyn. Kóńilin tabýǵa tyrysyp, tárbıe berý barysynda dos sekildi aralasamyn. Birge oıyn oınaǵan kezde olardyń qyzyq kóretin keıipkerine de aınala salý maǵan túk qıyn emes. Olar analarynyń áskerı qyzmet atqaratynyn biledi. Mundaı kezde olar da eresek adam sekildi jaýapkershilik joǵary ekenin jaqsy túsinedi. Kútpegen tapsyrmalar men shuǵyl jaýyngerlik daıyndyq ýaqyttarynda balalarym maǵan túsinistikpen qaraı alady. Olardy sol úshin de qurmetteımin, maqtan etemin. Men úshin árbir mınýtym baǵaly. Qolym qalt etken ýaqytta olarmen birge kitap oqyp, paıdaly ispen shuǵyldanýǵa ýaqyt tabamyn», deıdi ol.
Qyzmet pen otbasyn qatar alyp júrgen kópbalaly ana turaqty sportpen aınalysady eken. Qoıan-qoltyq urystan sport sheberi atanǵan onyń aýzynan bul sport túrinen jetistikteri de az emes ekenin baıqadyq. Qoly qalt ete qalsa, áýeletip án aıtqandy unatatyny taǵy bar. Salıqaly áıeldiń sıpatyn kórsetken keıipkerimizdiń boıyndaǵy senimdilik pen tabandylyq áskerı salada adal qyzmet etýge kómektesse, otbasyndaǵy tárbıeniń tizginin berik ustaýǵa da septigin tıgizse kerek.
