Eńbek jolyn ótken ǵasyrdyń 70-jyldary Almaty oblysy, Raıymbek aýdany Tekes orta mektebinde muǵalimdikten bastaǵan Ǵaısha Ákimqojaqyzy 40 jyldan beri bilim salasynda úzdiksiz jumys istep keledi. Onyń otyz jyly kitaphana isimen tyǵyz baılanysty.
Ǵaısha Ákimqojaqyzy kitaphana qorymen, Prezıdenttiń mektep kitaphanalarynyń qoryn jańalaý jáne tolyqtyrý týraly tapsyrmasyna oraı iske asyp jatqan jumys barysymen tanystyrdy. Qazirgi kezde mektep kitaphanasynyń qorynda 3 myńnan astam kórkem ádebıet, 29 myń oqýlyq bar. Degenmen kitaphananyń ádebı, tanymdyq, ǵylymı-kópshilik baǵyttaǵy qory áli de azdyq etedi. Ásirese qazaq tildi kitaptar qoryn tolyqtyrý ýaqyt kúttirmeıdi.
«2022 oqý jyly qorymyz memleket tarapynan berilgen 100 shaqty kitappen tolyqty. Bul mektebimizdegi kitap oqýǵa qushtar oqýshylardyń suranysyn qanaǵattandyrýǵa baǵyttalǵan qadamnyń biri ǵana. Qordaǵy kitaptar birdi-ekili danadan saqtalatyndyqtan, qyzyǵyp suraǵan kitaptaryna balalar únemi qol jetkize bermeıdi. Ásirese qazaq tilindegi balalar ádebıeti, ertegiler múldem az», deıdi Ǵaısha Ákimqojaqyzy.
Mektep dırektorynyń oqý isi jónindegi orynbasary Gúlnar Tólekovanyń aıtýynsha, únemi izdeniste júretin oqýshylardy pán boıynsha da, sabaqtan tys materıaldar kóp qyzyqtyrady. Al olardyń údesinen shyǵý úshin mektep kitaphanasynyń jumysynda damyl joq. «Meńgerýshi Ǵaısha Ákimqojaqyzy men kitaphana qyzmetkeri Jazıra Aqjoltaeva kúndelikti kitap qoryn saqtaý, oqýlyq taratý sııaqty kózge kórine bermeıtin jumystyń bel ortasynda júrip, kishkentaı oqyrmandardyń da kóńilin taba biledi. Kitap qorynyń saqtalýyna jaýap berý bar da, oqýlyqtarmen jumys óz aldyna bólek másele. Oqýlyqty oqýshylardan qabyldap alý, onyń ár paraǵyn túgendep, jańa oqý jylynda kelesi oqýshyǵa tabystaý – úlken qajyr-qaıratty talap etedi. Kitaphananyń kópshilik bile bermeıtin ishki jumysy munymen bitpeıdi. Meńgerýshi Ǵaısha Ákimqojaqyzy zeınet jasyna qaramastan, kitaphananyń jumysyn jandandyryp, únemi túrli mádenı is-sharalardyń bel ortasynda júredi. Osyndaı kásibı mamannan jastardyń úıreneri kóp. Bir áttegen-aıy, jalaqysy mardymsyz kitaphanashy jumysyna jastardy tartý óte qıyn», deıdi G.Tólekova.
«Kitaphanaǵa bastaýysh synyp oqýshylary kóp keledi. Olar zamanaýı bezendirilgen, jyldam oqylatyn, mazmuny tartymdy kitaptarǵa qyzyǵatyn bolsa, joǵary synyp oqýshylaryn ǵylymı-kópshilik, tarıhı kitaptar, kórkem ádebıet kóp qyzyqtyrady. Alaıda kitaphanaǵa kelip túsken kitaptardyń denin aýdarma ádebıetter quraıdy. Kitap oqyǵysy keletin balalardyń tól ádebıetimizben sýsyndap óskeni mańyzdy. Bıyl kitaphana qory B.Soqbaqbaev, S.Muratbekov, B.Momyshuly, M.Maqataev, taǵy da basqa qalamgerlerdiń birdi-ekili shyǵarmalarymen tolyqty. Degenmen munyń ózi oqyrmandar úshin azdyq etedi. Munda ár kitap kem degende 10-15 danadan bolǵanda ǵana oqyrmandar suranysyn qanaǵattandyra alamyz», deıdi kitaphana meńgerýshisi.
Kitaphana qorymen tanysa júrip, rasymen de «Aldar kóse», «Qobyzdyń hıkaıasy», «Shejireli jerler», «Otyrar kitaphanasy», «Qorqyt ata», «Ájemniń ertegileri», «Janýarlar týraly ertegiler», «Qojanasyrdyń aıdy aspanǵa shyǵarýy», taǵy basqa qazaq tilindegi kitaptardyń eskirip ketkenin kórdik. Osy mazmundaǵy tozǵan kitaptarǵa jańasha reńk berip, ár paraǵyn túgendep otyratyn mamandar balalardyń kitapqa qyzyǵýshylyǵyn arttyra túsý maqsatynda tól ádebıetimizdiń baı qory jasaqtalýǵa tıis ekenin alǵa tartady.
Oqyrman qyzyǵýshylyǵyn arttyrý maqsatynda mektepte bookcrossing buryshyn uıymdastyryp, balalardyń úıden ákelgen kitaptarymen tolyqtyryp otyrýdy dástúrli sharaǵa aınaldyrǵan. «Munda balalar kitap oqyp qana qoımaı, qyzý pikirtalasqa túsip, kitap jaıyndaǵy áńgimeler aıtýy – olardyń bos ýaqytyn tıimdi ótkizýge múmkindik beredi» deıdi kitaphana meńgerýshisi.
Aıtsa aıtqandaı, Ǵaısha Ákimqojaqyzy ózi jumys isteıtin kitaphana ǵana emes, basqa da bilim oshaqtaryndaǵy áriptesterimen tájirıbe almasyp, semınarlarǵa turaqty qatysyp keledi. Osy jyldardaǵy eńbegi elenip, kitaphana salasynyń úzdigi óz isiniń kásipqoıy retinde kóptegen marapatqa ıe boldy. Desek te, mektep kitaphanashylaryna ortaq máselede qordalanyp, sheshimin tabatyn jaıttar jetkilikti. Qala mektepterindegi kitaphanalarda úlken qormen jumys istep jatqan kitaphanashylardyń qataryn kóbeıtý máselesi de áli kúnge sheshimin tappaı keledi. Qazirgi kezde kitaphana qyzmetkerlerin tolǵandyryp otyrǵan túıtkildi máseleniń biri – oqýlyqtarmen jumys. Oqýlyqty taratý, kútýin qamtamasyz etý men oqý jyly sońynda jınap alýdyń mashaqaty kóp. Sondyqtan mektep kitaphanasynyń jumysy oqýlyqpen emes, balalardy kitap oqýǵa, ádebı qordy damytýǵa baǵyttalýǵa tıis. Mektep kitaphanashylarynyń máselesi Oqý-aǵartý mınıstrligi nazarynan tys qalǵan. Bul kópten beri kitaphanashylardy tolǵandyryp júrgen jaıt. Eger de kitaphanashylardyń osy ýájine memleket tıisti kóńil bóletin bolsa, onda mektep kitaphanashylarynyń jalaqysy da ósip, áleýmettik mártebesi de artqan bolar edi. Al mektep ujymy men jas oqyrmandardyń alǵysyn arqalap, qalaıda oqýǵa qushtar oqýshylardyń kóńilinen shyǵýǵa tyrysyp júrgen mamandardyń isi qashanda zor qurmetke laıyq.
ALMATY
