Pavlodarda óńirlik etnomádenı birlestikterdiń ózara is-qımyldaryn uıymdastyrý máseleleri boıynsha oblystardaǵy «Qoǵamdyq kelisim» mekemeleri basshylaryna arnalǵan respýblıkalyq semınar ótti. Is-sharada 16 jyl tarıhy bar jergilikti Dostyq úıiniń ultaralyq kelisim men turaqtylyqty nyǵaıtý, ár halyqtyń ana tilin, salt-dástúrdi, etnos mádenıetin jańǵyrtý maqsatynda atqaryp jatqan jumystary tájirıbe retinde kórsetildi. О́ńirlik Qazaqstan halqy Assambleıasy qurylymdary, etnomádenı birlestikter men shyǵarmashylyq ujymdar etnosaralyq kelisim ıdeıalaryn júzege asyrýda aıtarlyqtaı is tyndyryp otyrǵany baıqaldy. Uıym mekeme qyzmetin qaıta formattaýdyń jańa tásilderine baılanysty barlyq aýqymdy is-sharany keshendi túrde ótkizýdi ádetke aınaldyrǵan. «О́skeleń urpaqqa ónegeli tárbıe», Event-tram «Dostyq tramvaıy», «Ánimdi saǵan arnaımyn, Qazaqstan», «Qazaqsha án salaıyq», «Ulttyq kıim – ulttyń kórki», taǵy basqa jobalar óziniń tıimdiligin baıqatypty.
– Byltyr Dostyq úıiniń 15 jyldyǵyna oraı «Dostyq úıi – beıbitshilik pen kelisim mekeni» atty keshendi joba aıasynda 60-tan asa is-shara uıymdastyrylyp, 3,5 myńnan asa adam qamtyldy. Bizde etnomádenı birlestikter men qurylymdardyń birlesken jumys tájirıbesin kórsetetin «Komıýnıtı-ortalyq» bar. Memleket basshysy Qasym-Jomart Toqaev qazaq tiline qatysty «Egemen Qazaqstan» gazetine bergen suhbatynda «Qazaqtyń tili – qazaqtyń jany! Halqymyzdyń tarıhy da, taǵdyry da – tilinde... Biz memlekettik tildiń mártebesin kóterý baǵytyndaǵy jumystardy úzdiksiz jalǵastyra beremiz», dep aıtqany málim. Bul tarapta Assambleıadaǵy «Qazaqsha án salamyz» atty jobamyz ózge ult ókilderine memlekettik tildi úıretýde mańyzdy bolyp otyr. Negizgi maqsaty – jastar arasynda qazaq mádenıetine degen qurmet sezimin tárbıeleý, ózge etnos ókilderi arasynda rýhanı birlik pen ultaralyq kelisim ıdeıalaryn taratý, memlekettik tildiń damýyna yqpal etý. Bul arqyly qazaqtyń mádenı qundylyqtary ulyqtalady. Etnomádenı birlestikterdiń ókilderi qazaqsha án shyrqap, rýhanı ónerimizben tanysady, – deıdi jergilikti «Qoǵamdyq kelisim» KMM basshysy Núrııa Kóbenova.
Mádenıet jáne aqparat mınıstrligi Etnosaralyq qatynastardy damytý komıteti Qazaqstan halqy Assambleıasymen ózara is-qımyl basqarmasynyń basshysy Dınara Jumanova «Qoǵamdyq kelisim» mekemesi jáne Dostyq úıleriniń jumystaryn jetildirý máselesi árqashan ózekti ekenin atap ótti. Bul úderis memlekettik etnosaıasattyń basymdyqtary men qoǵamdyq suranystarǵa sáıkes kelýi ári úzdiksiz bolýy kerek.
«Assambleıanyń 33-sessııasyndaǵy sheshimderdi ómirsheń etý úshin bizdiń mınıstrlik, QHA jáne depýtattar men jergilikti atqarýshy organdardyń ózara is-qımyldaryn biriktiretin 34 Jol kartasy, QHA-nyń 13 arnaıy jobasy júzege asyp jatyr. Aldaǵy jyly Assambleıanyń qurylǵanyna 30 jyl tolǵaly otyr. Soǵan oraı «Birlik pen kelisimniń 30 jyly» degen ataýmen is-sharalar jospary túzildi. Is-sharalardyń deni aǵartýshylyq, halyqtar arasyndaǵy dostyqty nyǵaıtý baǵyttarynda ótkiziledi. Bul tarapta ózge ult ókilderi arasyndaǵy memlekettik tildiń damýyna zor kóńil bólinedi. «Mámile», «Úıde sóıle», «Memlekettik tilge 7 qadam» klýbtarynyń arnasyn keńeıtý josparlanǵan. Al qoldanystaǵy qazaq tilin úıretý kýrstarynyń sapasyn kóterý mańyzdy», deıdi mınıstrlik ókili.
Semınarda elimizdiń ár túpkirinen jınalǵandar ózara pikir almasyp, túrli sheberlik saǵattaryna qatysty.
Pavlodar oblysy
