Aralbek jańa qyzmetine endi ǵana kirisken kezde mektep jabylýdyń az-aq aldynda turǵan edi. 5-synyp oqýshylary kóbeıtý kestesin bilmeıtin, al joǵary synyp oqýshylary 6-synyp deńgeıindegi tapsyrmalardy oryndaı almaıtyn. Osylaısha, Aidyn&Anar Rakhimbayev Foundation jáne álemdik deńgeıdegi pedagogıkalyq ýnıversıtetterdiń biri Michigan State University (MSU) qoldaýymen «YBYRAI MEKTEBI» jobasy bastaý aldy.
«YBYRAI MEKTEBI» - oqýshylardy, ata-analardy jáne muǵalimderdi biriktiretin ınnovasııalyq bilim berý ekojúıesi. Aýyldyń tiregine aınalǵan komıýnıtı-ortalyq ata-analardy oqý prosesine belsendi túrde tartyp, olardy arnaıy kýrstardan ótkizip, balalaryn tárbıeleý jáne damytý jolynda qoldaý kórsetedi. Sonymen qatar bul ortalyq aýyl balalaryna robototehnıka, gıdroponıka, ekologııa, medıa-saýat sııaqty buryn qoljetimsiz bolǵan úıirmelerge qatysý múmkindigin berip otyr. MSU-men birlesip ázirlengen bilim berý ádistemelerin qoldaný arqyly aýyldyq jerlerde de álemdik deńgeıdegi bilim alýǵa jaǵdaı jasalyp otyr.
2022 jyly mektep pen komıýnıtı-ortalyqty jańartýǵa $1,1 mln bólindi. Sonyń arqasynda ınfraqurylym jańartylyp, zamanaýı tehnologııalar engizildi. 15 jańa úıirme ashylyp, 173 oqýshy turaqty túrde qatysyp júr.
Magıstr dárejesi bar muǵalimderdiń úlesi 15%-dan 25%-ǵa deıin ósti. Bul pedagogtardyń biliktiligin arttyryp, oqý prosesine zamanaýı ádisterdi engizýge yqpal etti.
2023 jyly úsh oqýshy oblystyq daryndy balalarǵa arnalǵan mektepke, bir oqýshy IQanat High School Burabay-ǵa qabyldandy. Sońǵy eki jylda UBT boıynsha ortasha ball 53-ten 102-ge deıin ósti.
«Meniń basty maqsatym - árbir oqýshynyń áleýetin ashýǵa múmkindik beretin bilim berý ekojúıesin qurý, al ata-analar men muǵalimder bul prosestiń belsendi qatysýshylary bolady. Biz bilim berip qana qoımaı, qazirgi zamanǵa beıimdelip, básekege qabiletti tulǵa qalyptastyrýdy kózdeımiz. Biz «YBYRAI MEKTEBI» jobasyn odan ári damytyp jatyrmyz, men ony aýyldyq bilim berýdiń bolashaǵy dep sanaımyn», deıdi Aralbek Berikuly.
24 qazanda MSU jáne Y.Altynsarın atyndaǵy Ulttyq bilim akademııasy ókilderiniń qatysýymen joba nátıjelerine arnalǵan konferensııa ótti. MSU professory BetsAnn Smith jobanyń Qazaqstandaǵy aýyldyq bilim berý úshin mańyzdylyǵyn atap ótti: «YBYRAI MEKTEBI - bul jańashyldyq pen qoǵam qoldaýy tipti eń shalǵaı aımaqtardaǵy bilim berý júıesin ózgerte alatynyn kórsetetin mysal. Biz ata-analar men jergilikti kóshbasshylardy tartý arqyly aýyldyq jerlerde turaqty bilim berý modelin qalyptastyryp jatqanymyzdy kóremiz».
Aralbek jobadaǵy kelisimsharty aıaqtalǵanyna qaramastan, aýylda qalý týraly sheshim qabyldaǵan. Ol elordadaǵy ómirden bas tartyp, oqýshylarynyń joǵary nátıjelerge qol jetkizýi úshin Qulynjonda jumysyn jalǵastyrdy. Endi ol mektepti keńeıtý jáne shalǵaı aýyldardan keletin oqýshylarǵa arnalǵan jataqhana salýdy kózdep otyr.
