Fotolar: Aqtóbe oblysy ákimdigi
«Dúnıe dıdaryndaǵy Dımash» kórmesiniń ashylý saltanatyna álemge áıgili ánshiniń ustazy, QR eńbek sińirgen qaıratkeri Marat Áıtimov, áke-sheshesi Qanat Aıtbaev pen Sveta Aıtbaeva qatysty.
Quttyqtaý sózinde oblys ákimi Ashat Shaharov:
«Mıllıondaǵan kórermendi ónerimen tánti qylǵan Dımash – Aqtóbe oblysynyń Qurmetti azamaty. Sondyqtan da onyń shyǵarmashylyǵyna arnalǵan kórme – qonaqtar men turǵyndardy beı-jaı qaldyrmasy anyq. Kópshilikke usynylyp otyrǵan kórme ómiri men ónerdegi jetistikterinen quralyp otyr. Osy oraıda kórmeniń Astanadan keıin týǵan jerinde uıymdastyrylýyna septigin tıgizgen Dımashqa jáne ata-anasyna shynaıy alǵysymyzdy bildiremiz», dedi.
Sharada Dımash Qudaıbergenniń repertýaryndaǵy halyq áni «Daıdıdaýdy» A.Jubanov atyndaǵy Aqtóbe mýzykalyq kolledjiniń oqýshylary oryndady.
Shashý shashylyp ashylǵan kórmede altyn daýysty ánshiniń qazaqy bolmysyn, onyń qaıtalanbas únin qalyptastyrǵan ortasyn, jeke oqıǵalardy qozǵaýǵa múmkindik beretin eksponattar jáne tanymal tulǵalar men kóptegen jankúıerdiń syılyqtary usynyldy.
Kórme mazmuny jaǵynan bir-birimen baılanysty 4 bólimnen turady.
Birinshisi «Shabyt kózderi» dep atalady. Onda ártistiń ómirbaıany, ósken ortasy, balalyq shaǵy, shyǵarmashylyq joly kórsetiletin zattar (fotosýretter, jekelengen zattar);
Ekinshisi «Dańqqa aparar jolda» – kásibı bilim jolynda respýblıkalyq, halyqaralyq baıqaýlarda jáne t.b. alǵan dıplomdary men marapattary;
Úshinshisi «Jankúıerler mahabbaty» - ártistiń jankúıerleriniń tartý etken syılyqtary;
Tórtinshi bólim «Ult mádenıetiniń jarshysy» dep atalady, álemdik arenada ulttyq mádenıet pen brendtiń tanylýyna yqpal etetin zattary (ulttyq mýzykalyq aspaptar, ulttyq kostıýmderi, baspa materıaldary jáne t.b.) qoıylǵan.
Kórme jumysy 24 jeltoqsanǵa deıin jalǵasady.
