Foto: Oqý-aǵartý mınıstrligi
Oqý-aǵartý mınıstri áriptesterin saltanatty jaǵdaıda quttyqtap, qoǵamdaǵy ustaz róliniń mańyzdylyǵyn atap ótti. Onyń aıtýynsha, jyl saıyn qazaqstandyq ustazdar halyqaralyq deńgeıde joǵary kórsetkishterge qol jetkizip keledi. Mınıstr bıyl oqýshylar álemdik bedeldi pándik olımpıadalarda 26 medal jeńip alǵanyn jáne bul júldelerdiń ekeýi altyn medal ekenin atap ótti.
«Memleket kúlli pedagogıkalyq qaýymdastyqqa orasan zor senim men qurmet, qoldaý bildirip keledi. Kúni keshe ǵana bizdiń eki ustazymyz «Qazaqstannyń Eńbek Eri» ataǵyna ıe boldy, búgin de pedagogterimizdi tórge ozdyryp, olarǵa qurmet kórsetýdemiz. Bul marapattardyń barlyǵy ustazdardyń elimizdiń ıgiligine, adamı kapıtaldy qalyptastyrýǵa jáne óskeleń urpaqty tárbıeleýge qosqan ólsheýsiz adal eńbekteriniń memleket tarapynan laıyqty baǵalanatynyn jáne pedagog mártebesin kóterýdiń jańa kezeńin aıǵaqtaıdy», dedi Ǵanı Beısembaev.
Aıta keteıik, respýblıkalyq baıqaý jeńimpazdary «Úzdik pedagog» kýáligimen, «Úzdik pedagog» tósbelgisimen jáne 1000 AEK (3,6 mln teńgeden astam) mólsherinde aqshalaı syıaqymen marapattaldy.
Sondaı-aq Respýblıka kúnine arnalǵan saltanatty sharada oqý-aǵartý júıesiniń birqatar qyzmetkerlerine «Eren eńbegi úshin», «Eńbek ardageri» medalderi, «Y. Altynsarın», «Bilim berý isiniń qurmetti qyzmetkeri» tósbelgileri jáne basqa da vedomstvolyq nagradalar tapsyryldy.
