Matematıka maıtalmany

О́rkenıetke bastar jol­dyń bastaýy mektep desek, mekteptiń basty tul­ǵasy, júregi – muǵalim. Árı­­ne, ustaz júgi – aýyr júk. Ustazdar jaıynda halqymyzdyń uly batyry Baý­yrjan Momyshuly: «Ustazdyq – uly qurmet. Sebebi, urpaqtardy ustaz tárbıeleıdi. Bolashaqtyń basshysyn da, danasyn da, ǵalymyn da, eńbekqor eginshisin de, kenshisin de ustaz ósiredi», degen bolatyn. О́mirge urpaq bergen analardy qandaı ardaqtasaq, sol urpaqty tárbıeleıtin ustazdardy da sondaı ardaqtaýǵa mindet­timiz» degen. Bala boıyna ata-anadan keıingi aqyl-oı, adamgershilik, ádeptilik, ar-uıat, ulttyq sana-sezimdi sińirýshi adam – taǵy da ustaz. Endeshe, óz isine berilgen, jańalyqty jatsynbaı qabyldaıtyn, shákirtiniń janyna nur quıyp, ózgelerdi baqytqa jetkizsem dep júretin ustaz­dardyń jóni de, joly da bólek. Osyndaı «oı eńbeginiń beınetin zeınet sanaıtyn» asyl ustazdardyń biri – Astana qalasyndaǵy №69 mektep-gımnazııanyń jo­ǵary sanatty matematıka páni muǵalimi Nurbek Qasymhanov. О́zi­niń 36 jyldyq ustazdyq jolynda ol qanshama shákirtti uıadan qııaǵa ushyryp, oqýshylary men olardyń ata-analarynyń sansyz alǵysyna bólengen baqytty jan. Astana qalasy Esil aýdany ákiminen tynymsyz eńbegi men ozyq tájirıbesi úshin madaqtama aldy. Oqýshy bilimin sarapqa salatyn pándik olımpıadalar – bilim men eńbektiń dodasy. Bilimniń maıtalmandary bas qosatyn alaman báıgeden júldeli oryndy enshileý ekiniń biriniń qolynan kele bermesi anyq. Onyń shákirtteri halyqaralyq matematıkalyq olımpıadalardan júldeli oryndar alyp júr. Nurbek aǵaıdyń bul jeńisi – onyń eńbeginiń jemisi. Sebebi, ol tek óz pániniń ulaǵatty ustazy ǵana emes, synybynyń ákesi ispettes, ár shákirttiń júregine úńilip, jeńisine birge qýanady. О́z synybyndaǵy oqýshylarmen mektep, qala kóleminde uıymdastyrylǵan is-sharalardyń basy-qasynda júrip, qoǵamdyq isterden shet qalǵan emes. Ústimizdegi jyly mektebimizge «Bıoaqparattandyrý jáne sınergetıka» tehnologııasy engizilgen bolatyn. Osy tehnologııany paıdalanýda Nurbek Mamyrhanuly óziniń ozyq tájirıbesin kórsete bildi. Sonyń nátıjesinde «BjS» tehnologııasy boıynsha I dárejeli dıplommen marapattalyp, tehnologııany jaqsy meńgergeni úshin «Klassık-Bıs» biliktigi berildi. Sonymen qatar, ol birneshe avtorlyq baǵdarlamalar qurastyrdy. 2009 jyly «Modýl tańbasy bar teńdeýler men teńsizdikter» atty ádistemelik quraly basylyp shyqty. Ǵalamtorǵa matematıka páni boıynsha sabaqtary jiberildi. 2012 jyly 10-synypqa arnap «Kómekshi sheńber ádisi» taqyrybynda elektıvtik kýrsyn jazdy. «Geometrııa Astany» kitabynda logıkalyq eki esebi jarııalandy. Ustazdyń osyndaı tabystarǵa qol jetkizýi onyń izdenimpazdyǵy men eńbekqorlyǵynyń, asqan jaýapkershiliginiń arqasy deýge bolady. Onyń jasaǵan eńbekteri izin basyp kele jatqan ustazdarǵa úlgi bolarlyqtaı. Jazıra DOSPANOVA, № 69 mektep-gımnazııanyń bastaýysh synyp muǵalimi. ASTANA.