Halyqtyń yqylasy erekshe

Qarańyzshy, saılaý ótip jatqan mezgildiń ózi ǵajap. Tabıǵat-ana jańaryp, jasaryp ketken. Kún de erekshe nurly. Aınalamyzdy qorshaǵan jasyl-jelek búr jaryp, kókteýi – osy úlken sharany sımvolıkalyq jaǵynan qýattaǵan sekildi. Múmkin ol kezdeısoq nárse shyǵar. Deıturǵanmen, jaqsylyqqa baladyq. Baıqaımyn, halyq ta úlken merekedegi sııaqty ózi bir-birimen qushaqtasyp, qaýyshyp jatty. Zady, óz basym bul saılaýdyń erekshe ekenin bylaı túsinemin. Dál búgingi Qazaqstannyń damý qarqyny shapshań. Soǵan sáıkes kezekten tys saılaýǵa kelýshiler de óte belsendi. Buryndary qalaı edi, jurt saılaýǵa uıqylary qanǵan soń baratyn. Meniń balalarymnyń ózi túske jaqyn qozǵalatyn. Bul joly kelin balamyz, nemeremiz keshke kelip qonyp, tańerteń erte №381 ýchaskege daýys berýge birge bardyq. Barsaq – qaraqurym halyq. Bul kóńilge sondaı jyly áser etti. Saılaýshylardyń bári qarap júrgen adamdar emes, saılaýdyń sonshalyqty mańyzdy ekenin, el ıesi Prezıdentimizdiń jasaǵan eńbeginiń sonshalyqty qasıetin sezinýi – bul halyq sanasynyń óskendigi dep oılaımyn. Qarańyzshy, halyqqa usynǵan qan­shama baǵdarlamalar tek sóz júzinde emes, iske asyp jatyr. Qanshama zaýyttar, joldar, tarıhta bolmaǵan alpaýyt qurylystar salynýda. Eger buryndary mundaı jaǵdaılardy qulaǵymyzben estisek, endi kózimizben kórip otyrmyz. Bizdiń bolashaǵymyz – jastar jónindegi baǵdarlamalar qandaı! Qazir halyqaralyq «Bolashaq» baǵdarlamasymen oqý bitirip kelgen jastar Otanyna qyzmet etip jatyr. Olardyń daryndylyǵy, toptan ozyp kele jatqandyǵy, bilimdarlyǵy sezilip tur. Mundaı joba basqa bir elde bolmaǵan. Mádenıet, sport salasyndaǵy qamqorlyqtary óz aldyna bir álem. Iá, bul buryn-sońdy qazaqtyń mańdaıyna bitpegen baqyt dep oılaımyn. Jaratqannyń bizge bergen baǵy ǵoı. О́ıtkeni, qazaqty dúnıejúzine tanytqan – Prezıdentimiz. Ol ońaı sharýa emes. Elińdi tórtkúl dúnıege moıyndatý úshin Memleket basshysynyń boıynda uly qasıetter bolýy kerek. Ol Nurekeńde bar. Dúnıejúziniń el bılegen prezıdentteri buryndary Qazaqstandy basqaryp otyrǵan basshysyn atamaq túgili, onyń eli qaıda ornalasqanyn bilmeıtin. Qazir Nurekeńe tilek aıtyp, kerek jerinde ol kisiniń pikirimen de sanasýda. Tipti, Nazarbaevtyń júrgizip otyrǵan júıesin óz elinde qoldanamyz dep otyrǵan memleketter de bar. Buǵan ózim asa qýanyshtymyn. Baıaǵyda bireý aıtqan eken, «myltyqty nagan kúninen bilemin» dep. Sol aıtpaqshy, Nursultandy jas kezinen bilemin. «Jaınatyp nurly joldyń altyn tańyn, Kósh bastap bara jatyr Nursultanyń. Halqyna jan aıamaı qyzmet etti, Jas urpaq Elbasynan alsyn tálim», – degen bir aqsaqaldyń Prezıdentimizge bergen batasyn gazetten oqyǵanym bar edi, sol kóshti bastaǵan Nursultannyń nurly joly ashyq bolsyn, dańǵyl bolsyn. Sábıt Orazbaev, akter, Memlekettik syılyqtyń laýreaty. ALMATY. Sýretti túsirgen Aıtjan MURZANOV.