Soltústik Qazaqstanda ardagerlerge 190 myń teńgeden beriledi

PETROPAVL. 29 qańtar. Turǵyndar aldyndaǵy eseptik kezdesýde qala ákimi Marat Tasmaǵanbetov Jeńistiń 70 jyldyǵyna oraı soǵys ardagerleri men múgedekteriniń árqaısysyna beriletin syıaqy mólsheriniń ulǵaıtylyp, 190 myń teńge bolatynyn jetkizdi. Bul týraly qalalyq ákimdiktiń baspasóz qyzmeti habarlady. «Otan úshin ot keship, qardaı boraǵan oqtyń astynda júrgen maıdangerlerdiń qatary sırep keledi. Oblys ortalyǵynda 162 soǵys ardageri men 6 myńnan astam tyl eńbekkeri turady. Olardyń birde-bireýi qamqorlyqtan shet qalmaıdy. Basqa da kómekter uıymdastyrylady», dedi óz sózinde Marat Imanbaıuly. Búginde Uly Jeńistiń 70 jyldyǵyna arnalǵan sharalar tyńǵylyqty júrgizilýde. Sonyń bir mysalyna Jeńis saıabaǵyn qalpyna keltirý jumysyn aıtýǵa bolady. Qalalyq máslıhat depýtattarynyń sheshimimen jergilikti bıýdjetten bólinetin bir rettik tólemder kólemi ulǵaıtyldy. Ol soǵys múgedekteri men qatysýshylary úshin 100 aılyq eseptik kórsetkishti qurasa, tyl eńbekkerleri úshin 25 aılyq eseptik kórsetkishke deıin kóbeıtilip otyr. Sondaı-aq, shıpajaılarda emdelý, tis protezdeý maqsattaryna 214 mln. teńge qarastyryldy. О́mir Esqalı. Derek: Petropavl qalalyq ákimdiginiń baspasóz qyzmeti. Sýret: ortcom.kz.