Atyraýda ustalǵan qytaılar elden qýyldy

ATYRAÝ. 29 qańtar. Atyraý oblysynda ishki ister organdaryna tirkelmeı, kóshi-qon zańdylyǵyn buzǵan Qytaı azamattary el aýmaǵynan shyǵarylatyn boldy. Bul týraly egemen.kz tilshisi habarlady. Buǵan deıin Atyraýda qalalyq ishki ister basqarmasy men prokýroratýranyń birlesken reıdi kezinde Qytaı azamattarynyń ustalǵanyn habarlaǵan edik. Belgili bolǵanyndaı, qytaılyq 38 adam Qazaqstanǵa «iskerlik» vızasymen «VSP» seriktestigine keńes berý qyzmetin kórsetý úshin kelipti. Alaıda, Atyraýǵa kelgennen keıin sheteldikter belgilengen zańǵa sáıkes ishki ister organyna ýaqytsha tirkeýge turmaǵan. Sóıtip, Qazaqstan Respýblıkasyna kelý zańdylyǵyn buzǵan Qytaı azamattaryna qatysty ákimshilik hattama toltyrylyp, sotqa joldanǵan bolatyn. «Sotta Qytaı Halyq Respýblıkasynyń 38 azamaty ózderiniń kinálaryn tolyqtaı moıyndady. Endi olar mamandandyrylǵan ákimshilik sottyń qaýlysyna sáıkes 5 táýliktiń ishinde Qazaqstan Respýblıkasynyń aýmaǵynan shyǵyp ketýleri tıis» dep málimdedi Atyraý oblystyq sotynyń baspasóz hatshysy Boranbaı Ǵalıev. Joldasbek Shópeǵul. Derek: Atyraý oblystyq sotynyń baspasóz qyzmeti. Sýret: alashainasy.kz.