Foto: Ǵylym jáne joǵary bilim mınıstrligi baspasóz qyzmeti
WISE (Bilim berýdegi ınnovasııalar jónindegi dúnıejúzilik sammıt) jáne IIE (Halyqaralyq bilim berý ınstıtýty) basqaratyn bul konsorsıýmǵa álemniń jeti ýnıversıteti qatysýda. Aldaǵy 12 aıda olar jasandy ıntellekti bilim berý júıelerine biriktirý joldaryn zerttemek. Maqsaty – stýdentterge jasandy ıntellekt róli aıqyn bolatyn álemdik ekonomıkanyń talaptaryna daıyndalýǵa kómektesý.
Nazarbaev ýnıversıteti Kásibı oqytý jáne damytý jónindegi sarapshysy Aıda Nuranova:
«Nazarbaev ýnıversıteti osy bastama aıasynda foundation, bakalavrıat pen magıstratýra ártúrli deńgeılerindegi oqytý ádisterine baǵyttalǵan kópsalaly zertteýler júrgizedi. Bul mańyzdy zertteý joǵary oqý oryndarynda bilim berý úderisinde jasandy ıntellekti qoldanýdyń úzdik tájirıbelerin aıqyndaıdy. Jobaǵa shaqyrtý NU aımaqtaǵy bedelin jáne bilim berý salasyndaǵy ınnovasııaǵa degen umtylysyn rastaıdy», dep atap ótti.
Konsorsıým quramyna Nazarbaev ýnıversıtetinen bólek, University of Pennsylvania (AQSh), Universidad Camilo José Cela (Ispanııa), Ashesi University (Gana), Birla Institute of Technology & Science (Úndistan), Universidad de los Andes (Kolýmbııa), Hamad Bin Khalifa University (Katar) kiredi. Olar bilim men tájirıbe almasýǵa arnalǵan birlesken semınarlarǵa qatysady.
WISE konsorsıýmy resmı túrde Nıý-Iorkte, BUU Bas Assambleıasy otyrysymen qatar bastaý aldy.
WISE bas dırektory Stavros Iаnnýka:
«Bul konsorsıým ártúrli óńirler men kózqarastardy eskerip, aımaqtyq erekshelikterdi zertteýge múmkindik beredi. Bizdiń maqsatymyz – saıasatty qalyptastyryp, qýatty tehnologııalardyń barlyǵyna qoljetimdi bilim berýge qyzmet etýin qamtamasyz etý», dedi.
Konsorsıým músheleri kezdesý barysynda semınarlar men paneldik talqylaýlarǵa qatysyp, joǵary bilim berý salasynda jasandy ıntellekti tıimdi paıdalanýdyń joldaryn talqylady. Nazarbaev ýnıversıteti atynan Aıda Nuranova ýnıversıtettiń zertteýleri men jasandy ıntellekt damýynyń bilim berý bolashaǵyna áserin túsindirdi.
Zertteý nátıjeleri kelesi qarashada Katarda ótetin WISE sammıtinde usynylady. Nazarbaev ýnıversıteti bul jobaǵa qatysý arqyly bilim berý salasyndaǵy ınnovasııalar men jasandy ıntellekt bolashaǵyn qalyptastyrýǵa úles qosyp, óziniń jahandyq baılanystaryn nyǵaıta túsedi.
