- Aıgúl hanym, Frankfýrt kitap kórmesi kóptegen el úshin ádebı baılanys ornatýǵa múmkindik beretin álemdik alań sanalady. Siz úshin osy kórmege qatysýdyń negizgi máni men mańyzy nede boldy?
- Frankfýrt kitap kórmesine qatysýymyz – bul Arman-PV baspasy úshin ǵana emes, jalpy elimiz úshin de mádenıet pen rýhanııat salasyndaǵy mańyzdy qadam. Álemniń ár buryshynan jınalǵan zııaly qaýymǵa Qazaqstannyń ádebı murasy men rýhanı baılyǵyn pash etý – bizdiń baspamyz úshin úlken mártebe. Buryn ár baspa óz aldyna kórmege qatyssa, bıylǵy jyly QR-nyń Mádenıet jáne aqparat mınıstrligi bizge tutas platforma jasap, úlken qoldaý kórsetti. Bul pavılon otandyq ádebıetti jahandyq deńgeıde kórsetýge erekshe múmkindik syılap, ulttyq qundylyqtarymyzdy jan-jaqty tanytýǵa jol ashty. Kórmeniń uıymdastyrylýynda Ulttyq memlekettik kitap palatasy mańyzdy ról atqardy. Arman-PV jáne basqa da jetekshi baspalar, atap aıtqanda, Almatykitap, Atamura, Steppe&World, Mektep, Kókjıek-Gorızont baspalary bir pavılon aıasynda birtutas qurylym retinde jumys istep, Qazaqstannyń rýhanı murasyn álemdik sahnaǵa shyǵarýǵa atsalysty.
- Frankfýrt kórmesinde qandaı taqyryptar kóterildi, siz úshin qaısysy erekshe mańyzdy boldy?
- Bıylǵy Frankfýrt kitap kórmesine 4,300-den astam baspa men uıymdar 100-ge jýyq elden jınalyp, óz jumystaryn tanystyrdy. Bul sharada turaqty damý, sıfrlyq tehnologııalar, mádenı almasý jáne jasandy ıntellekttiń qoǵamǵa áseri sııaqty ózekti máseleler talqylandy. Jahandyq klımattyń ózgerýi men demokratııalyq qundylyqtardy qoldaý syndy mańyzdy baǵyttarǵa erekshe nazar aýdaryldy.
Kórme barysynda kitaptardyń bilim men aqparat kózi ǵana emes, sonymen qatar qoǵam aldyndaǵy jahandyq jaýapkershilik pen bolashaqqa yqpal etý quraly ekeni aıqyndaldy. Ártúrli taqyryptyq baǵyttardaǵy pikirtalastar, kezdesýler, mádenı baılanystar bizdi jańa ıdeıalar men jobalardy iske asyrýǵa shabyttandyrdy. Osy talqylaýlardyń nátıjeleri bizdiń oqý materıaldary men basylymdarǵa ınnovasııalyq kózqaraspen qaraýymyzdy jáne olardy jetildirýge degen yntamyzdy arttyrdy.
- Bilýimshe, Arman-PV baspasy uzaq jyldar boıy oqý ádebıetin shyǵarýmen aınalysyp keledi. Nege ınteraktıvti jáne tanymdyq kitaptarǵa qyzyǵýshylyq tanyttyńyzdar, tolyǵyraq aıtyp bere alasyz ba?
- Biz 22 jyldan beri oqýlyqtar shyǵarý isimen aınalysyp kelemiz. Osy ýaqyt aralyǵynda elimizdiń bilim berý salasynda sapaly oqý quraldaryn usyný bizdiń basty maqsatymyzǵa aınaldy. Degenmen, zaman talabyna saı alǵa jyljý jáne oqytý úderisin qyzyqty ári ınteraktıvti etý qajettiligin sezindik. Sondyqtan jańa formattar men ádisterdi izdep, damyta berýdi kózdeımiz.
О́tken jyly Frankfýrttaǵy kitap kórmesinde biz ıtalııalyq Nui Nui baspasymen tanystyq, bul kezdesý bizdiń jumysymyzǵa jańa baǵyt ákeldi. Birlese otyryp, kóne órkenıetter jaıly pop-ap jáne 3D kitaptar jasadyq, sonymen qatar Qazaqstannyń mádenıeti men tarıhyna arnalǵan dál osyndaı jobalardy iske asyrýǵa kiristik. Bul kitaptar oqýshylardy vızýaldy ári qyzyqty formatta bilim alýǵa yntalandyrady.
Sondaı-aq kórmede biz ınteraktıvti aýdıokitaptarymyzdy – «Aǵylshyn tilin ońaı úırenemiz», «Ýchım anglııskıı legko», «Ýchım kazahskıı legko» kitaptaryn tanystyrdyq. Bul kitaptar jas oqyrmandarymyzǵa tildi ońaı, ári tıimdi meńgerýge kómektesedi. Sonymen qatar, Qazaqstan mádenıetin nasıhattaıtyn «Abaı» ensıklopedııasy, «Ǵarysh qupııalary» syndy úsh tilde jaryq kórgen balalar kitaptary Eýropadaǵy otandastarymyzdyń erekshe qyzyǵýshylyǵyna ıe boldy. Munyń barlyǵy bizdiń elimizdiń mádenı murasyn saqtap, ony álemge tanytýǵa qosqan úlesimiz dep sanaımyn.
- Kórme barysynda jańa seriktester taptyńyzdar ma, jáne osy seriktestikter Arman-PV baspasynyń bolashaǵy men damýyna qandaı yqpal etýi múmkin?
- Kórmeniń biz úshin eń úlken jetistikteriniń biri – Qytaıdyń balalarǵa arnalǵan bilim berý ádebıetin shyǵarýmen aınalysatyn Beijiao Children Joy Education & Technology kompanııasymen kelissózder bastaýymyz boldy. Bul seriktestik bizge shetel naryǵynda da, óz elimizde de joǵary suranysqa ıe biregeı oqý materıaldaryn jasaýǵa múmkindik bermek.
Arman-PV baspasy úshin mundaı halyqaralyq baılanystardyń bolýy – bizdiń maqsatymyzǵa jetý jolyndaǵy úlken qadam. Bizdiń oqyrmandarymyz sapaly, zamanaýı jáne ınteraktıvti oqý quraldaryna qol jetkizýi tıis. Osy jobalar aıasynda biz oqý prosesin tartymdy, oqýshylarǵa qolaıly formatta jetkizýdi kózdeımiz. Bul bizdiń elimizdegi oqyrmandarymyz úshin ǵana emes, jalpy bilim berý salasyna qosqan úlesimiz dep sanaımyn.
Bul saparymyz barysynda Qazaqstannyń Maındaǵy Frankfýrt qalasynyń Konsýldyǵynda Qazaqstannyń Bas konsýly Taýbaldy Úmbetbaev myrzamen kezdesý ótti. Bizge erekshe qonaqjaılylyq kórsetildi. Konsýldyqta ótken kezdesýde baspamyzdyń jetistikteri men aldaǵy josparlarymyz týraly pikir almasyp, shet elde júrip, ózimizdi týǵan elde júrgendeı sezindik. Sonymen qatar, Ulttyq memlekettik kitap palatasynyń tóraǵasy Ádil Qoıtanov, Jazýshylar Odaǵynyń tóraǵasy Mereke Kulkenov, jazýshy-ǵalym Orazaly Sábden syndy tulǵalarmen pikir almasý múmkindigine ıe boldyq. Osy qoldaý biz úshin aldaǵy jolda úlken senim men shabyt berdi.
- Arman-PV baspasy men otandyq kitap basý salasynyń aldaǵy josparlary qandaı strategııalyq baǵyttardy qamtıdy, jáne halyqaralyq kórmelerden alynǵan tájirıbe men jańa seriktestikterdiń eldiń bilim berý jáne mádenıet salasyna tıgizetin yqpaly qandaı bolýy múmkin?
- Álginde aıtqanymdaı, biz 22 jyl boıy oqýlyqtardy shyǵarý isinde sapaǵa erekshe kóńil bólip kelemiz jáne bul baǵyttaǵy jumysymyzdy odan ári jalǵastyramyz. Elimizdiń árbir óńirindegi oqýshyǵa sapaly, túsinikti, zamanaýı oqýlyqtar usyný – bizdiń basty maqsatymyz. Qazirgi ýaqytta halyqaralyq seriktestiktermen jumys jasap, qazaq oqyrmandaryna jańa bilim berý tásilderin tanystyrýdy kózdeımiz. Bul kórmeden úırengenimizdi kitaptarymyzda ǵana emes, jalpy bilim berý úderisine engizýge tyrysamyz.
Arman-PV baspasynyń maqsaty – Qazaqstan oqyrmandaryna álemdik deńgeıde moıyndalǵan sapaly ádebıetti jetkizý, oqytý men tárbıeleý úderisin jańartý jáne mádenı muralarymyzdy saqtaý. Mundaı halyqaralyq kórmelerge qatysý bizdiń tájirıbemizdi baıytyp, jańa serpin beredi.
