Is-sharany BUU-nyń Esirtki jáne qylmys jónindegi basqarmasy (BUU EQB) Qazaqstan Respýblıkasynyń Sybaılas jemqorlyqqa qarsy is-qımyl agenttigimen birlesip uıymdastyrdy.
Konferensııa jumysyna Qazaqstan, Qyrǵyzstan, Tájikstan, Túrikmenstan jáne О́zbekstannyń sybaılas jemqorlyqqa qarsy vedomstvolarynyń basshylary, Parlament depýtattary, Prezıdent Ákimshiliginiń, dıplomatııalyq mıssııalardyń, halyqaralyq jáne qoǵamdyq uıymdardyń, memlekettik organdardyń ókilderi qatysty. Qazaqstan tarapynyń shaqyrýy boıynsha is-sharaǵa Gonkongtyń Sybaılas jemqorlyqqa qarsy kúres jónindegi táýelsiz komıssııasynyń komıssary qatysty.
Konferensııa qatysýshylaryna arnalǵan Prezıdent Ákimshiliginiń Basshysy A. Dadebaıdyń quttyqtaý sózin Quqyq qorǵaý júıesi bólimi meńgerýshisiniń orynbasary A. Dıýsembekov jetkizdi.
BUU EQB-nyń Aýǵanstan, Ortalyq Azııa, Iran jáne Pákistan boıynsha óńirlik ókili Olıver Shtolpe, Gonkongtyń Sybaılas jemqorlyqqa qarsy kúres jónindegi Táýelsiz tomıssııasynyń komıssary D. Vý, Tájikstannyń Memlekettik qarjy monıtorıngi jáne sybaılas jemqorlyqqa qarsy kúres agenttiginiń dırektory S. Sýltonzoda, О́zbekstannyń Sybaılas jemqorlyqqa qarsy is-qımyl agenttiginiń dırektory A. Býrhanov, Túrikmenstannyń Bas Prokýrorynyń orynbasary A. Nyıazlyev, Qyrǵyzstannyń Bas Prokýrorynyń orynbasary N. Kaımov sóz sóıledi.
Is-sharada aktıvterdi qaıtarý, jemqorlyqtyń aldyn alý, sıfrlandyrý, azamattyq qoǵamnyń jemqorlyqtyń aldyn alýǵa qatysýy, sondaı-aq yntymaqtastyqty nyǵaıtýdyń ózekti máseleleri talqylandy.
Sybaılas jemqorlyqqa qarsy is-qımyl agenttiginiń Tóraǵasy Ashat Jumaǵalı óz sózinde halyqaralyq yntymaqtastyqtyń, ásirese Ortalyq Azııadaǵy mańyzdylyǵyn atap ótti.
Ol: «Qazaqstanda jemqorlyqqa qarsy reformalardy iske asyrýda BUU-nyń Sybaılas jemqorlyqqa qarsy konvensııasynda kózdelgen ozyq standarttar negizgi baǵdar bolyp tabylady. Sybaılas jemqorlyqtyń transulttyq sıpatyn eskere otyryp, birlesken jumys óńirdiń damýy úshin mańyzdy. Bul jerde shet elderdiń basqa da sybaılas jemqorlyqqa qarsy vedomstvolarymen ózara is-qımyl jasaýda mańyzdy», dep atap ótti.
A. Jumaǵalı BUU EQB-ǵa qoldaý kórsetkeni úshin rızashylyǵyn bildirip, О́ńirlik platformany qurý jemqorlyqqa qarsy jańa sharalardy damytýǵa jáne elder arasyndaǵy ózara is-qımyldy nyǵaıtýǵa yqpal etetinin atap ótti.
О́z kezeginde Olıver Shtolpe: «BUU-nyń Sybaılas jemqorlyqqa qarsy konvensııasyn jedeldetip iske asyrýǵa arnalǵan óńirlik platformasy – Ortalyq Azııa elderine sybaılas jemqorlyqqa qarsy kúreste jáne Zań ústemdigin nyǵaıtýda kúsh biriktirýge múmkindik beretin mańyzdy qural. Sybaılas jemqorlyqqa qarsy vedomstvolar arasyndaǵy áriptestiktiń arqasynda biz Ortalyq Azııadaǵy jemqorlyqqa tıimdi qarsy kúres úshin áriptestik baılanystardy nyǵaıtýǵa jáne kúsh-jigerdi úılestirýge yqpal ete otyryp, bilim men ozyq álemdik tájirıbelermen almasý úshin jaǵdaı jasaımyz», dep aıtty.
Konferensııa Ortalyq Azııa elderiniń quqyqtyq kómek, aktıvterdi ekstradısııalaý jáne qaıtarý máselelerinde halyqaralyq baılanystardy nyǵaıtýǵa beıildiligin rastady.
Forým aıasynda Halyqaralyq sybaılas jemqorlyqqa qarsy kúres akademııasy (Gonkong) tıimdi aldyn alý, aktıvterdi qaıtarý ádisteri jáne qarjylyq tergeý taktıkasy boıynsha trenıngter ótkizdi.
BUU-nyń Sybaılas jemqorlyqqa qarsy konvensııasyn iske asyrý О́ńirlik platforma sheńberinde jalǵasatyn bolady, al Qazaqstan men basqa da elder qoǵamdaǵy ashyqtyq, eseptilik jáne parasattylyqtyń jalpy qaǵıdattaryn ilgeriletetin bolady.
