Bul vıza zamanaýı kóshpelilerge - saıahattap, qashyqtan jumys isteıtin sheteldik týrısterge arnalǵan. Jańa vızalyq rejım pandemııadan keıin osyndaı baǵdarlamalardy sátti engizgen 50-den astam eldiń halyqaralyq tájirıbesin nazarǵa alǵan.
Neo Nomad vızasyn alý úshin sheteldik azamat Qazaqstannan tys jerde turaqty kirisiniń bar ekenin dáleldeýi kerek, onyń mólsheri aıyna keminde 3 000 AQSh dollary bolýy kerek. Sonymen qatar negizgi kiris talaptarynan basqa, sheteldik ótinish berýshiden medısınalyq saqtandyrý jáne sottylyǵynyń joq ekeni týraly anyqtama talap etiledi.
Vıza qashyqtan jumys isteıtin týrısterge, ıaǵnı baǵdarlamalaý, marketıng, qarjy, konsaltıng, dızaın jáne elektrondy kommersııa sııaqty túrli salalarda qyzmet etetin sheteldik azamattarǵa arnalǵan. Vıza ıeleriniń bir jylǵa deıin Qazaqstanda turýǵa múmkindigi bar. Osy ýaqyt ishinde olar sheteldik kompanııalarda jumys isteı alady. Bul sheteldik týrısterge Qazaqstan mádenıeti men turmysyn jaqynyraq tanýǵa múmkindik berse, elge ekonomıkalyq paıda ákeledi dep josparlanyp otyr.
Vıza engizilgen jaǵdaıda jylyna 500 adam ony alsa, ekonomıkalyq áser shamamen 3,6 mıllıard teńge bolady dep boljanyp otyr. Neo Nomad vızasyn paıdalanatyn sheteldik azamattar Qazaqstanda turyp, qarajatyn osynda jumsaıdy, biraq otandyq eńbek naryǵyna áser etpeıdi.
