Jeńistiń 70 jyldyǵyna 7 tolyq, 70 qysqametrajdy fılm usynady

«Qazaqstan» respýblıkalyq teleradıokorporasııasy Jeńistiń 70 jyldyǵyna oraı tarıhı-tanymdyq derekti fılmder toptamasyn usynady. Álem tarıhyndaǵy eń surapyl soǵysqa 1 mıllıon 200 myń qazaqstandyq qatysyp, onyń 600 myńnan astamy qaza tapqanyn, maıdandy qarýmen, kıimmen, azyq-túlikpen qamtamasyz etý jumysyna balalardan qarttarǵa deıin qatysqanyn eskergende, bul – Qazaqstan úshin umytýǵa bolmaıtyn taqyryp. Sol eresen erlik pen tynymsyz eńbek shejiresi «Qazaqstan» respýblıkalyq telera­dıo­korporasııasynyń tapsyrysy boıynsha «MG production» kompanııasy túsirgen «Eldiń erligi» atty 7 bólimnen turatyn tolyq­metrajdy derekti fılmge arqaý boldy. Ol týǵan el úshin janyn pıda etken qahar­mandardyń, tyǵyryqtan jol tapqan komandırlerdiń, Jeńistiń jaqyndaýyna úles qosqan eńbekkerlerdiń taǵdyryna arnalǵan. Maıdan men tyl oqıǵalary boıynsha túsirilgen kórinister barynsha shynaıylyǵymen erekshelenedi. Derekti fılmder jelisi 2 aqpannan bastap 20.00-de «Qazaqstan» ulttyq telearnasynyń efırine shyǵady. Sondaı-aq, Jeńistiń 70 jyldyǵyna oraı 70 qysqametrajdy derekti fılm ázir­lený­de. Onda kózi tiri maıdan jáne tyl ardager­­leri­­niń estelikterimen qatar Reseı, Ýkraına, Bela­rýs muraǵattarynan tabylǵan qazaqstandyq­tar­ǵa qatysty qujattar, sol elderdiń muraǵat qorynan alynyp, buǵan deıin telearnalardan berilmegen kınokórinister bar. Ataqqa usynylǵanymen, tıisti marapattaryn ala almaǵan belgisiz batyrlar, habarsyz ketken soldattar, soǵys jyldarynda sýyt kóshirilgen zaýyt-fabrıkalar, tyl eńbekkerleriniń eleýsiz qalǵan  erekshe áreketteri, Qazaqstanǵa eriksiz qonys aýdarǵandardyń aýyr taǵdyry keńinen qamtylǵan. Budan basqa Ulttyq arna efıri men «Qazaq radıosy» arqyly maıdannan joldanǵan hattar oqylyp, ol týraly aqparat Korporasııa portalyna shyǵady. «Qazaqstan» Respýblıkalyq teleradıokorporasııasy «Qazaqstan» Ulttyq telearnasyn, «Balapan» jáne «KAZsport» arnalaryn, Qazaq radıosyn, «Shalqar», «Astana», «Classic» radıolary men aımaqtyq teleradıokompanııalardy biriktiredi. Korporasııanyń resmı portaly www.kaztrk.kz. Korporasııanyń áleýmettik jelilerdegi paraqshalary: facebook.com/Kaztrk.kz, twitter.com/kaztrk_kz, youtube.com/user/NTKKazakhstan «Egemen-aqparat».