Parlament Májilisi Tóraǵasynyń orynbasary Darıǵa Nazarbaeva bastaǵan qazaqstandyq delegasııanyń Germanııaǵa jáne Lıhtenshteın Knıazdigine sapary bastaldy.
Sapardyń negizgi maqsaty – Qazaqstannyń 2017-2018 jyldarǵa BUU Qaýipsizdik Keńesiniń turaqty emes músheligine kandıdatýrasyn ilgeriletý, sondaı-aq, eki el arasyndaǵy parlamentaralyq ózara is-qımyldyń qazirgi ahýaly men keleshegin talqylaý.
Baǵdarlama aıasynda Berlınde Býndestag Tóraǵasynyń orynbasary Iohannes Zınghammermen jáne Berlın Senatynyń spıkeri Ralf Vılandpen jáne Býndestag depýtattary Sanfred Grýnd bastaǵan «Germanııa – Ortalyq Azııa» parlamenttik dostyq tobynyń múshelerimen kezdesýler ótti. Kezdesý barysynda Qazaqstan men Germanııanyń parlamentaralyq baılanystaryn nyǵaıtý máseleleri keńinen talqylandy. Osy rette taraptar 90-jyldary tarıhı otanyna oralǵan etnostyq nemis azamattarynyń «bizdiń elderimizdiń arasyn baılanystyratyn kópir» ekendigi aıtyldy. Ásirese, halyqaralyq kún tártibindegi ózekti máselelerge nazar aýdaryldy.
Germanııalyq tarap Qazaqstannyń «tek Ortalyq Azııada emes, jalpy Azııa aýmaǵynda turaqtylyq kemesi» bola júrip, ǵalamdyq saıasattyń eń jaýapty jerlerinde qomaqty tájirıbe jınap, halyqaralyq qatynas alańynda mańyzdy elge aınalǵanyn atap kórsetti. Sonymen qatar, Qazaqstan Prezıdentiniń Ýkraınadaǵy jaǵdaıdy retteýge qatysty dánekerlik róline asa joǵary baǵa bere otyryp, óz taraptarynan Mınsk kelisimderin júzege asyrý aıasynda janjaldy beıbit jolmen sheshý úshin bar kúsh-jigerlerin jumyldyratynyna sendirdi.
Al GFR Syrtqy ister mınıstrliginiń stats-hatshysy Markýs Ederermen kezdesýinde Darıǵa Nazarbaeva Qazaqstan Prezıdentiniń elimizdiń kandıdatýrasyn 2017-2018 jyldarǵa BUU Qaýipsizdik Keńesiniń turaqty emes músheligine ilgeriletý máseleleri jónindegi Arnaıy ókili retinde Germanııa kansleri A.Merkeldiń atyna Elbasynyń joldaýyn tabys etti.
Delegasııa basshysy kezdesý ıelerin Qazaqstannyń aımaqtyq jáne halyqaralyq turaqtylyq pen qaýipsizdikti nyǵaıtý jolynda atqaryp jatqan jumystarynan habardar etti. Osy rette ıadrolyq qarýsyzdaný jáne taratpaý, sondaı-aq, AО́SShK men EQYU aıasyndaǵy belsendi is-qımyldarǵa nazar aýdaryldy. D. Nazarbaeva Qazaqstan tarapynan Aýǵanstanǵa jasalyp jatqan gýmanıtarlyq jáne tehnıkalyq kómekterdi de sóz etti. 2010 jyldan beri myńdaǵan aýǵandyq stýdenttiń Qazaqstan joǵary oqý oryndarynda erkin bilim alýyna jol ashqan bilim baǵdarlamasy júzege asyrylyp jatqanyn atap kórsetti. Qazaqstannyń mádenıetaralyq jáne dinaralyq únqatysýdy qoldaý ári damytý jolyndaǵy qosyp jatqan úlesi de jan-jaqty baıandaldy.
D.Nazarbaeva Germanııanyń qoǵamdyq-saıası jáne isker toptar ókilderimen kezdesýinde Elbasynyń ótken jyldyń qarasha aıyndaǵy «Nurly Jol – bolashaqqa bastar jol» Joldaýynda aıtylǵan Qazaqstannyń Jańa Ekonomıkalyq Saıasatynyń negizgi baǵyttaryna jáne eldegi ınvestısııalyq klımatqa toqtaldy. Taraptar eki el arasynda, sonyń ishinde Eýrazııalyq ekonomıkalyq odaq aıasynda saýda-ekonomıkalyq yntymaqtastyqty keńeıtý múmkindikterin talqylady.
Nemis saıasatkerleriniń Parlament Májilisi Tóraǵasynyń orynbasary D.Nazarbaevamen kezdesýleri barysynda aıtqan pikirleri
Zınghammer IOHANNES, Býndestag Vıse-prezıdenti: – Qazaqstanǵa eldi tabysty saıası jáne ekonomıkalyq jańǵyrtý turǵysynan kelsek, óńirdegi turaqtylyqtyń tini bolyp tabylady. Men el basshylyǵy júzege asyryp jatqan, qoǵamdy toptastyrý men konfessııaaralyq kelisimdi nyǵaıtýǵa baǵyttalǵan ulttyq saıasatty joǵary baǵalaımyn. Qazaqstan – bir elde túrli etnostardyń ókilderi túsinistik pen kelisimde tura alatynynyń jarqyn mysaly. Manfred GRÝND, Býndestag depýtaty, «GFR-Ortalyq Azııa» parlamenttik tobynyń jetekshisi: – Qazirgi tańda Qazaqstan men Germanııa arasynda turaqty da ózara senimge qurylǵan saıası únqatysý bar. Qazaqstan búginde salmaqty da utymdy ultaralyq saıasat júrgizip kele jatsa, bul úderis ulttyq azshylyqtar tarapynan keń qoldaý taýyp otyr. Bul jerde Qazaqstan men Germanııa arasynda «jandy kópir» qyzmetin atqaryp kele jatqan nemis dıasporasynyń damýyna da úlken qoldaý kórsetilip otyrǵanyn atap kórsetken jón. Peter TILS, Qazaqstan – Germanııa Iskerler keńesiniń tóraǵasy, Deutsche Bank-tiń atqarýshy dırektory: – Nemistiń isker toptary Qazaqstan ekonomıkasyn ındýstrııalandyrý men jańǵyrtýǵa belsendi qatysýǵa nıetti ekendikterin qýattap otyr. О́z basym da Qazaqstan ekonomıkasyn jańǵyrtýǵa ǵana emes, Astanada EKSPO-2017 halyqaralyq mamandandyrylǵan kórmesin ótkizýge belsendi qatysýǵa daıyn ekenin bildiremin. Munda jetekshi nemis tehnologııalaryn paıdalanýǵa da ázirmin. Taǵy bir atap kórseterim, búginde kórmege qatysýǵa qyzyǵýshylyq tanytyp otyrǵan kompanııalardyń tizimi belgili. Mıhael GLOS, GFR-diń burynǵy ekonomıka mınıstri: – Men Qazaqstan Prezıdenti Nursultan Nazarbaevtyń eldiń ekonomıkasyn damytý men halyqtyń ál-aýqatyn arttyrý jolynda júrgizip kele jatqan kóregen saıasatyn joǵary baǵalaımyn. Qazaqstan halyqaralyq arenada da tabysty saıasat júrgizip keledi. Bul óz kezeginde Astanaǵa óziniń tabystarymen shyn máninde maqtanýǵa quqyq beredi. Markýs EDERER, GFR Syrtqy ister mınıstrliginiń stats-hatshysy: – Qazaqstan Germanııanyń Ortalyq Azııadaǵy basty áriptesi bolyp tabylady. Qazirgi kúnge deıin eki el arasynda ornyqty únqatysý qalyptasyp úlgergen. Bul únqatysý ekijaqty saparlar almasýlardyń jıiliginen jáne belsendi ekonomıkalyq yntymaqtastyqtan aıqyn kórinedi. Nemister Qazaqstan men onyń Prezıdentine Ýkraınadaǵy janjaldy retteýge belsendi kúsh-jiger jumsap kele jatqany úshin de dán rıza. Sáýlebek BIRJAN.
