Foto: facebook.com/darhan.hidirali
Senatordyń sózinshe, Qazaqstan fýbolynyń búgingi deńgeıi syn kótermeıdi. Keıingi maýsymda el chempıondary tek penaltı serııasy arqyly anyqtalǵany osyǵan dálel. Darhan Qydyráli álemdegi eń tanymal sporttyń eldegi damýy aqsap turǵanyn sapasyz salynǵan stadıondarmen baılanystyrdy.
«Elimizde osy 30 jylda 2 stadıon ǵana salynǵan eken. Alaıda sonyń ekeýi de, nebári bir oıynnan keıin jaramaı, jabylǵan «Túrkistan arena» da, «Astana Arena» da qaıta kúrdeli jóndeýden ótti. Qalǵan stadıondar eski, kóbi ÝEFA talaptarynyń tómengi deńgeıine de saı kelmeıdi. Al keıbir óńirler jyl aralap tozyǵy jetken stadıondaryn qaıta kúrdeli jóndeýden ótkizedi. Onyń ornyna osy qyrýar qarjyǵa árbir oblys ortalyǵynda talapqa saı stadıondar nege salynbaıdy? Munda jemqorlyq joq pa?», dedi Darhan Qydyráli.
Ol bir kezderi fýtbol oınaý sheberligi bizdiń elmen deńgeıles bolǵan Grýzııa, О́zbekstan balalar fýtbolyn qoldaý, mamandar daıarlaý, ınfoqurylymdy damytý, biryńǵaı júıe qabyldaý, fýtbol alańdary men stadıondar salý arqyly nátıjege jetkenin erekshe atap ótti.
Senator premer-lıgadaǵy júıesizdikpen qatar, Ulttar lıgasy syndy álemdik dop dodalaryndaǵy antı-rekordtarǵa jol berip otyrǵan ózge elden kelgen bapkerlerdiń aılyǵyna suraý saldy. Alańda jappaı legıonerlerdiń dop tebýin de túırep ótti.
«Elimizdegi fýtboldy damytýǵa jaýapty federasııanyń jyldyq bıýdjeti 10 mlrd teńgeni (20 mln eýro) quraıdy. Bul qarajattyń qaıda, qalaı jumsalyp jatqany týraly ashyq málimet joq. Komandasy qarsylastar qaqpasyna bir gol sala almaı antı-rekord jasap otyrǵanyna qaramastan ózi Eýropanyń azýly quramalarynyń bapkerlerinen kóbirek jalaqy alatyn ulttyq quramanyń bas bapkeriniń aılyǵy qupııa. Federasııa bul aqparatty kimnen jasyrady?», dedi senator.
Darhan Qydyráli Úkimet basshysyna joldaǵan saýalyn qorytyndylaı kele, fýtboldaǵy júıesizdikti zań sheberinde retteýdi usyndy. Mundaı tájirıbe álem elderinde bar ekenin eskertti.
