Naýqastyń dıagnozy anyqtaldy

Buǵan deıin habarlaǵany­myz­daı, 26 qańtarda Atyraýdaǵy «Teńiz» kenishindegi jobanyń merdigeri – «Imstalkom» seriktes­tiginiń eki qyzmetkeri juqpaly dertke shaldyǵyp, bireýi kóz jumǵan edi. Bastapqyda oblys ortalyǵyndaǵy aýrýhanaǵa jetkizilgen naýqasqa menıngıt, menıngokoksemııa syrqatymen aýyrǵan dep boljam jasalǵan bolatyn. Osyǵan baılanysty quramynda ınfeksıonıst-dáriger, epıdemıolog-dáriger, vırýsologııa jáne bakterıologııa zerthanasynyń meńgerýshileri bar brıgada qurylyp, «Teńiz» vahtalyq qalashyǵyna issaparǵa jiberilgen edi. Al keshe oblystyq tutyný­shylar quqyǵyn qorǵaý departa­menti basshysynyń orynbasary Erbolat Ýaıysov gazet tilshisine aýrýhanadaǵy naýqastyń dıag­nozy naqtylanǵanyn, medısına termınimen aıtqanda, menıngokokkty juqpa, menıngokoksemııa dep atalatynyn habarlady. «Epıdemıologııalyq tekserý kezinde qaıtys bolǵan adamda aýrýdyń klınıkalyq belgileri (bastyń aýrýy, tamaǵynyń aýyrsynýy, dene qyzýynyń 37,7 gradýsqa deıin joǵarylaýy) 21 qańtarda bastalǵany anyqtaldy. Naýqas medısınalyq kómekke júginbegen, óz betinshe emdelip, parasetomol, taǵy basqa dáriler qabyldaǵan. Dárigerlik kómekke júgingen kezde naýqasta jiti júrek jumysynyń álsireýi, ókpeniń isinýi belgileri bolyp, aýyr halde bolǵan. Ekinshi naýqasta aýrý belgileri 23 qań­tarda bastalǵan. Jaǵdaıy ortasha aýyr, turaqty, qazirgi kezde oblystyq juqpaly aýrýlar aýrýhanasynda em qabyldaýda. Aýrýlarmen birge jumys istegen 3 qyzmetker «Teńiz­shevroıl» seriktestiginiń klını­kasyna oqshaýlanyp, antıbıotıktermen profılaktıkalyq em alýda. Dıagnozdary klınıkalyq dáleldengen, laboratorııalyq zertteý juqpaly aýrýlar aýrýhanasy zerthanasynda jalǵasýda dep málim etti oblystyq tutyný­shylar quqyǵyn qorǵaý depar­tamenti basshysynyń orynbasary Erbolat Ýaıysov. Qazir juqpaly indet tirkelgen oshaq ornynda epıdemııaǵa qarsy sharalar jasalyp, jiti baqylaýǵa alyndy. Joldasbek ShО́PEǴUL, «Egemen Qazaqstan». Atyraý oblysy.