Foto: Vedomstvo
Qazaqstan Ortalyq Azııa elderimen jasalǵan kelisimder nátıjesinde 2025 jyldyń sáýir aıyna deıin Syrdarııa ózeni arqyly shamamen 11 mlrd tekshe metr sý alady.
Mınıstr Nurjan Nurjigitov Túrkimenstannyń Ashhabad qalasynda Memleketaralyq sý sharýashylyǵyn úılestirý komıssııasynyń (MSShÚK) 87-shi otyrysyna elimizdiń atynan qatysty. Kezdesýge Tájikstan, Túrkimenstan О́zbekstannyń sý sharýashylyǵy vedomstvolarynyń basshylary qatysty. Al Qyrǵyzstan eliniń ókilderi baqylaýshy retinde qatysty.
Nátıjesinde, 1 sáýirge deıin elimizdegi Shardara sý qoımasyna 11 mlrd tekshe metr sý jiberiledi dep kútilip otyr. Bul 2025 jylǵy sýarý maýsymynda elimizdiń ońtústik aımaqtaryna qajet sý kólemin jınaqtaýǵa múmkindik beredi.
Aıta ketsek, otyrysqa qatysýshylar Syrdarııa jáne Ámýdarııa ózenderi basseınderindegi sý qoımalarynyń boljamdy jumys kestesin bekitti, sonymen qatar 2024-2025 jyldardyń kúzgi-qysqy kezeńine Ortalyq Azııa elderine sý berý kólemin aıqyndady.
«Bıyl kelissózder men birlesken jumystyń nátıjesinde biz Syrdarııa ózeni basseıninde sýdy tıimdi bólýge qol jetkizdik. Sondaı-aq 86-shy otyrys qorytyndysy boıynsha birlesip atqarylǵan jumysqa oń baǵamdy bergim keledi. Atap aıtqanda, Qyrǵyzstanmen sý-energetıkalyq yntymaqtastyq týraly kelisimder júzege asyryldy, sondaı-aq bıyl sýarý maýsymynda «Bahrı-Tochık» sý qoımasynyń jumys kestesin úılestirý boıynsha is-sharalar qabyldandy», dedi mınıstr Nurjan Nurjigitov.
Aıta keteıik, MSShÚK 88-shi otyrysy 2025 jyldyń birinshi toqsanynda Dýshanbe qalasynda ótedi.
