Fotolar: drive.google.com
«Taraz-Arena» sport kesheninde Astana, Almaty, Shymkent qalalary jáne 17 oblystan kelgen 450-den astam balýan beldesti.
Ashylý rásiminde Týrızm jáne sport mınıstri Erbol Myrzabosynov sońǵy jyldary tól kúresimizdiń serpindi damyp kele jatqanyn atap aıtty.
«Memleket basshysynyń qoldaýymen ulttyq sport túrleri qarqyndy damyp keledi. Sonyń ishinde ulttyq brendimiz – qazaq kúresiniń orny bólek. 40-tan astam elde qazaq kúresi federasııalary jumys isteıdi. Búginde qazaq kúresinen 10 Álem chempıonaty, 12 Azııa chempıonaty, 6 Álem kýbogy, 6 Eýropa chempıonaty ótti. Al 2023 jyly Saýd Arabııasynyń Er-Rııad qalasynda ótken Dúnıejúzilik jekpe-jek oıyndary baǵdarlamasyna tól kúresimiz tuńǵysh ret endi. Balýandarymyz bıyl Astanada ótken 5-shi Dúnıejúzilik Kóshpeliler oıyndarynda úzdik nátıje kórsetip, 12 altyn, 1 kúmis, 2 qola medal ıelendi. Sportshylarymyzdyń halyqaralyq dodalarda top jaryp, ult abyroıyn asqaqtatyp júrgeni biz úshin úlken maqtanysh!», degen Erbol Qýantaıuly jarys qatysýshylaryna sáttilik tiledi.
Balýandar básekesi – KSRO-nyń jáne QR-nyń eńbek sińirgen jattyqtyrýshysy, Jambyl oblysynyń Qurmetti azamaty Jaqyt Marat Nurmuhambetulynyń 80 jyldyǵyna oraılastyryldy. Mereıtoı ıesine mınıstr Quttyqtaý hatyn tabystady.
Aıta ketsek, Marat Nurmuhambetuly 20 jyl boıy Qazaqstannyń, 10 jyl boıy KSRO-nyń quramasyn basqaryp qazaq sportyna zor eńbek sińirgen tulǵa. Ol 2 eńbek sińirgen sport sheberin, 25 halyqaralyq dárejedegi sport sheberin, 130 sport sheberin tárbıelegen.
Ashylý rásiminde Jambyl oblysy ákiminiń orynbasary Serik Sálemov óńir basshysynyń quttyqtaýyn jetkizip, Marat Jaqyttyń ıyǵyna shapan japty.
Al, Qazaq Kuresi Assosıasııasynyń bas dırektory Damır Bekbosynov oblysta qazaq kúresin damytýǵa úlesterin qosyp júrgen bir top azamatty Alǵys hatpen marapattady.
Qazaq Kuresi Assosıasııasynyń baspasóz qyzmetinen málim bolǵandaı, Qazaqstan Respýblıkasy chempıonaty 3 kúnge sozylyp, balýandar 16 salmaq boıynsha beldesti. Jeńis tuǵyrynyń eń bıigine shyqqan balýandar:
Erler arasynda Arhat Baımýrzınov (55 kg., Qostanaı oblysy), Nurtilek Qarakesekov (60 kg., Ulytaý oblysy), Nurǵalı Tursynǵazıev (66 kg., SQO), Tilek Toqtasynuly (74 kg., Jetisý oblysy.), Asyljan Kárim (82 kg., Túrkistan obl.), Aıdar Beskempir (90 kg., Jambyl oblysy), Ersultan Muzapparov (100 kg., Shymkent qalasy), Qaısar Shamshıdınov (+100 kg., Túrkistan oblysy), Muhtar Dálelhanýly (Túıe balýan, Pavlodar oblysy).
Áıelder arasynda Ińkár Quralbaı (48 kg., Jambyl oblysy), Saǵat Baıǵaraeva (52 kg., Jambyl oblysy), Aqnur Asylbekova (56 kg., Jetisý oblysy.), Bakyt Qusakbaeva (60 kg., Aqtóbe obl.), Uldana Tańjaryqova (65 kg., Jambyl oblysy.), Aqbota Qydyráli (70 kg., Túrkistan oblysy), Arýjan Jandarbaı (77 kg., Atyraý oblysy), Araılym Shegenova (+77 kg., Jambyl oblysy).
Al jalpykomandalyq oryndar boıynsha qorjyndaryna 5 altyn, 3 kúmis, 9 qola medal salǵan Jambyl oblysy top jardy. 3 altyn, 1 qola júlde alǵan Túrkistan oblysy ekinshi oryndy ıelendi. Al 2 altyn, 1 kúmis, 2 qolaǵa qol jetkizgen Jetisý oblysy úzdik úshtikti túıindedi.
