Fotolar: T.Tanybaev.
Májilis ǵımaratynda ótken jıynǵa Mádenıet jáne aqparat, Eńbek jáne halyqty áleýmettik qorǵaý, Ǵylym jáne joǵary bilim, Oqý-aǵartý, Ádilet, Ulttyq ekonomıka mınıstrlikteriniń basshylary jáne Sıfrlyq damý, ınnovasııalar jáne aeroǵarysh ónerkásibi mınıstrliginiń ókilderi, sondaı-aq kreatıvti ındýstrııa salasynyń sarapshylary qatysty.
Májilistiń baspasóz qyzmetiniń málim etýinshe otyrysty ashqan Ashat Aımaǵambetov kreatıvti ekonomıkanyń jan-jaqty damýyna Memleket basshysynyń erekshe kóńil bólip otyrǵanyn atap ótti.
«Kreatıvti ındýstrııalardy damytýdyń 2021–2025 jyldarǵa arnalǵan tujyrymdamasy bekitildi. Degenmen «Kreatıvti ındýstrııaǵa ne jatady?» degen suraq áli kúnge deıin tolyq sheshimin tappaǵan. Ár maman bul týraly ártúrli pikir aıtady. Biri kreatıvti hab qurý jetkilikti dese, endi biri qarjylaı qoldaý nemese salyqtyq jeńildikter qajet dep sanaıdy. Keıbiri «bizge kedergi jasamasańyzdar boldy» deıdi. Sondyqtan bul máseleni keshendi túrde qarastyrýymyz kerek», dedi A.Aımaǵambetov.
Májilis depýtaty Nartaı Sársenǵalıev baıandamasynda kreatıvti ındýstrııanyń áleýeti zor ekenin aıtyp, elimizde bul salanyń tolyqqandy damymaý sebepterine toqtaldy.
«BUU kreatıvti ındýstrııaǵa dızaın, sán, óner, kıno, mýzyka, medıa, kompıýterlik grafıka jáne basqa da salalardy jatqyzady. Bul baǵyttar bıýdjetke aıtarlyqtaı tabys ákelýi múmkin. Biraq Qazaqstanda 2015 jyldan beri salada aıtarlyqtaı ilgerileý baıqalmaı otyr. Biz álemde kreatıvti ındýstrııa boıynsha 84-orynda qalyp otyrmyz. Salany negizinen talantty jeke tulǵalar ustap tur», dedi ol.
Bravetalents medıakompanııasynyń negizin qalaýshy Almas Jálı jeke kıno óndirýshilerdiń salyqtyq jáne shyǵyn máselelerine toqtalyp, kreatıvti ındýstrııany Astana habyna qosý týraly usynys jasady. Sondaı-aq salaǵa salyqtyq jeńildikter engizýdi usyndy.
Depýtat Erlan Stambekov avtorlyq quqyqty memlekettik tirkeý máselesin kóterse, Juldyz Súleımenova zııatkerlik menshik pen avtorlyq quqyq týraly zańnamany jetildirý, granttar bólý jáne qarjylaı qoldaý sharalaryn naqtylaý qajettigin aıtty.
Otyrys barysynda aıtylǵan usynystar men pikirler Májilis depýtaty Nartaı Sársenǵalıev jetekshilik etetin jumys tobynda talqylanatyn bolady.
