Bul semınar 2022 jyldan beri bastaý alyp, dástúrge aınalǵan. Is-sharanyń maqsaty – kitaphanashylardyń kásibı qarym-qatynasyn nyǵaıtý, úzdik jumys ádisterimen bólisý jáne mektep kitaphanalaryna sıfrlyq tehnologııalardy engizý.
Semınar barysynda Pavlodar oblysynyń Bilim berý basqarmasynyń basshysy Samal Aıtkazına kitaphanashylarmen pikir almasyp, olardyń jobalary oqýshylardyń bilimge degen qyzyǵýshylyǵyn arttyrýdaǵy mańyzdy rólin atap ótti. Kitaphana isinde jobalardyń júzege asýyna baǵyt-baǵdar berdi. Semınar bes taqyryptyq alańda uıymdastyryldy, olardyń árqaısysy oqýshylardyń qyzyǵýshylyǵyn arttyrý, zertteýshilik daǵdylaryn damytý jáne zııatkerlik qabiletterin qalyptastyrýǵa baǵyttaldy. «Kitap áleminde múmkin emes nárse joq...» dep atalǵan alańda №3 daryndy balalar gımnazııasynda kóptildi jaǵdaıdaǵy oqýshylardyń oqý daǵdylaryn damytý ádisteri usynyldy.
Qatysýshylar qazaq ádebıeti jáne álem ádebıetine arnalǵan bıblıoperfomansqa, «Men kitapty beıneleımin» art-galereıasyna ekskýrsııa jasap, «Dáýirdiń ádebı kýágeri» atty kreatıvti joba usyndy.Abaı atyndaǵy daryndy balalar gımnazııasynda «Kitaphana – bilim men ǵylym ortalyǵy» atty alańda «Keıipkerler qonaǵynda» kórmesin jáne «Kitap ataýyn tap» ınteraktıvti logıkalyq alańyn uıymdastyryp, kitaphanany bilim berý prosesiniń ortalyǵy retinde kórsetti.
Baýyrjan Momyshuly atyndaǵy orta mektepte «Kitaphana jumysyndaǵy jańa formatty ádister» alańynda oqýshylardyń zertteý jáne qoldanbaly daǵdylaryn damytýǵa arnalǵan tásilder usynyldy. Qonaqtar «Gamma App» platformasymen, jasandy ıntellekt elementterimen jáne kórkem ádebıet shyǵarmalary boıynsha «Q Talks» jobasymen tanysty.
A.Baıtursynuly atyndaǵy mektepte «Bilim sınergııasy: kitaphana jáne belsendilik» atty jobasy talqylanyp, oqyrmandardy qoldaý máseleleri qaraldy. «Qýana oqıtyn mektep» jobasy jáne «READx» vorkshopy sııaqty ıdeıalar usynyldy.
«Zamanaýı oqyrmanǵa arnalǵan zamanaýı kitaphana» atty alań №7 mektepte ótti. Bul jerde aǵylshyn ádebı keıipkerleri boıynsha vıktorına jáne «Kitaptar sóıleıdi» kezdesýi uıymdastyryldy. Bul oqyrmandardyń qyzyǵýshylyqtaryn oıatýǵa baǵyttalǵan alań boldy.
«Semınar barysynda BOOK SLAM jobasy usynyldy. Bul joba oqýshylar arasynda kitap oqýdy nasıhattaýǵa baǵyttalǵan. Jeltoqsan aıynan bastap BOOK SLAM qalanyń jáne oblys aýdandarynyń mektepterinde ótkizilmek. 2025 jyldyń mamyr aıynda baıqaý qortyndysy bolady», deıdi Pavlodar oblysynyń Bilim berý basqarmasynyń mektepke deıingi jáne jalpy orta bilim berý bóliminiń basshysy Nurgúl Azanbaeva.
Aıta ketsek, BOOK SLAM (býkslem) – bul kitapty kópshilikke nasıhattaý maqsatyndaǵy eń úzdik prezentasııaǵa arnalǵan shyǵarmashylyq baıqaý. Qatysýshylar kitapqa degen qyzyǵýshylyqty arttyratyn jarnamalardy daıyndap, týyndyny erekshe formatta tanystyrýda baq synasady.
«Bul semınar mektep kitaphanalarynyń damýyna úles qosyp, oqý prosesine yqpalyn arttyrady jáne jańa býyn oqyrmandardy shabyttandyrýǵa kómektesedi», deıdi Sharbaqty aýdanynyń Abaı Qunanbaev atyndaǵy mektep kitaphanashysy Samal Sadýaqasova.
Forsaıt-sessııamen aıaqtalǵan semınarda mektep kitaphanasynyń keleshegi týraly sóz qozǵaldy. Semınar sonyńda óz tájirıbelerimen bólisken kitaphanashylarǵa jáne barlyq qatysýshylarǵa sertıfıkattar tabystaldy.
