Frankfurter Buchmesse álemdegi eń iri kitap kórmesi sanalady. Oǵan qatysýshy elderdiń qatary jyl saıyn artyp keledi. Osyǵan oraı Frankfurter Buchmesse atqarýshy dırektory jáne prezıdenti Iýrgen Boos kitap isi salasynaǵy yntymaqtastyqty damyta otyryp, Almaty qalasyndaǵy kitaphanalar, baspalar, kitap shyǵarý isine qyzyǵýshylyq bildirdi.
Kezdesýde shahar basshysy Erbolat Dosaev Frankfýrtten kelgen qonaqtarǵa ońtústik megapolıs týraly aqparat berip, qalanyń mádenı ómirimen tanystyrdy. Qazirgi kezde qala ákimshiligi tarapynan kitaphanalardy jetildirý men jańartý barysyna kóńil bólinip, ınnovasııalyq, kreatıvti sheshimder engizilýde. Munymen qosa qala basshysy qurmetti meımandarǵa qala ınfraqurylymy, ásirese, zamanaýı qoǵamdyq kólikterdi damytýǵa qatysty az-kem aqparat berip ótti.
Erbolat Dosaev atap ótkendeı, qala jyldan-jylǵa qarqyndy damyp keledi. Osy rette megapolıstiń mádenı ómirine de basa nazar aýdarý mańyzdy. Qazirgi kezde kitaphanalarǵa kelýshilerdiń sanyna qarap, qala turǵyndarynyń kitap oqýǵa degen qyzyǵýshylyǵyn joǵary ekenin kórýge bolady.
«Sońǵy jyldarda elektrondy kitaptarǵa degen suranystyń artqanyna qaramastan, qaǵazǵa basylǵan kitaptyń ómirsheń ekendigi kúmán týǵyzbaıdy. Qazirgi kezde qaladaǵy kitaphanalardyń 95 paıyzy jańartyldy. Qalanyń barlyq aýdandarynda jańa, zamanýı kitaphanalar ashyp, saýda oıyn-saýyq, komıýnıtı ortalyqtarynda avtonomdy kitaphanalar ornatylyp jatyr. Sonymen qatar jazýshylar men qazirgi zaman avtorlary ákimdik tarapynan úlken qoldaýǵa ıe» dep atap ótti qala basshysy.
О́z kezeginde Iýrgen Boss Frankfýrt delegasııasynyń Almatyǵa arnaıy kelgenin ári jazýshylar men jergilikti avtorlar úshin semınarlar ótkizip, aýqymdy kitap jármeńkelerin ótkizýge baılanysty keńes berýge daıyn ekenin atap ótti. Onyń aıtýynsha, Frankfurter Buchmesse jármeńkeler ótkizýmen ǵana emes, baspa isimen de aınalysady. Baspa salasy uzaq ýaqytty alatyn úrdis bolǵandyqtan, onyń barysynda tájirıbe almasý mańyzdy. Buǵan deıin Meksıka, Ońtústik Afrıka elderi, Birikken Arab Ámirlikterinde bolyp kitap jármeńkesin uıymdastyrýshylarmen kezdesip, semınarlar ótkizgenin atap ótken mártebeli meıman Qazaqstan tarapyn keler jyly Frankfýrt kórmesine qurmetti qonaq bolýǵa shaqyrdy. Búginde álem ádebıetiniń kórnekti ókilderiniń jarnamasyn jer-jahanǵa jarııa etip otyrǵan Frankfýrt kitap kórmesine Qazaqstan avtorlarynyń, qazaq qalamgerleriniń qatysýy álemdik keńistikke jol ashyp qana qoımaı, ádebı-mádenı yqpaldastyqtyń qarqyn alýyna yqpal etedi.
Taraptar kezdesý sońynda keler jylǵa qaraı birlesken jobalardy iske asyrýǵa, iskerlik baılanysty nyǵaıtýǵa ýádelesti.
