Qurmanǵazy atyndaǵy Ulttyq halyq aspaptar orkestriniń konsert zalynda ótken kesh shymyldyǵyn áıgili Qurmanǵazy atyndaǵy orkestr ashty. Rýhty jyr men júrek terber ánderdi arqaý etken keshtiń ashylýynda aqynǵa Mádenıet jáne aqparat vıse-mınıstri Qanat Ysqaqovtyń, Qazaqstan Jazýshylar odaǵy basqarmasynyń tóraǵasy Mereke Qulkenovtiń quttyqtaý hattary tabys etildi. Onda Aqsuńqar Aqynbabanyń qazaq rýhanııatyna qosqan qýatty jyrlary oqyrman júreginen oryn alyp qana qoımaı, jas urpaqty rýhanı baılyqqa jeteleıtini jazylǵan. Qasıetti atajurtqa kelgennen beri elge degen mahabbaty, ultqa degen qurmeti óleńderiniń negizgi mazmunyna aınalǵany ataldy.
Aqyn shyǵarmashylyq keshin «Rýh máńgi!» degen óleńimen, sazger Beıbit Oraluly ánin jazǵan óziniń oryndaýyndaǵy «Men oraldym» ánimen bastady.
«Aqsuńqar Aqynbaba – ádebıetke 90-jyldardyń basynda kelgen býyn ókili. Aqyn qyzdardyń arasynda óleńderinde de, minezinde de asqaq rýh andaǵaılap turatyn bir aqyn bolsa, ol – Aqsuńqar Aqynbaba. Aqsuńqardy biz 2000 jyldyń basynda ánshi retinde moıyndadyq. Kásibı ánshiden kem túspeıdi. Bul – ekinshi qyry. Al úshinshi qyryna kelsek, jýrnalıstıkadaǵy atqarǵan sharýasy az emes. Ol gazette, sondaı-aq Qazaq radıosynda ónimdi jumys istedi. Birtalaı baǵdarlamanyń avtory atandy. Mysaly, kezinde «Uıqym kelmeıdi» degen baǵdarlamasyn qalyń jurtshylyq uıyp tyńdaıtyn. Aqsuńqardyń bergeninen bereri alda degen úmittemiz» deıdi aqyn, «Úrker» jýrnalynyń bas redaktory Jaras Sársek.
О́ner kóginde juldyzy jaryq qaryndasyna qoldaý bildire kelgen aǵasy Shashý Úsenuly Aqsuńqar Mońǵolııanyń Baıanólgeı aımaǵynda orta mektepti bitirip, atajurtta joǵary bilim alǵan talant ıesi ekendigin, ata-anasy da ustazdyq etken, óte bilimdi, daryndy adamdar bolǵanyn aıryqsha atady. «Táýelsizdik kezeńindegi qazaq poezııasyna eńbek etip júrgenime shırek ǵasyrdan asady eken. Al atajurtyma kelgenime 30 jyl tolypty. Mektep bitirgen jyly kelgenmin. Sodan bergi ýaqytta ádebıetke, ónerge qosqan úlesimdi, shyǵarmashylyqtaǵy jaýharlarymdy jınaqtaı kele, «Altaı – Alataý arasy» degen jeke án-jyr shyǵarmashylyq keshimdi ótkizýdi jón kórdim. Án-jyr keshim deýimniń sebebi, óleńim men ánimdi qatar alyp kele jatpasam da, boıyma aqyndyq pen ánshilik qatar qonǵan óner. Sol sebepti, dombyram men qalamym – qos qanatym ispetti», deıdi kóptegen jyr músháıranyń júldegeri Aqsuńqar Aqynbaba.
Shyǵarmashylyq kesh aty aıtyp turǵandaı, aqynnyń otyz jylda jınaqtalǵan shyǵarmashylyǵy, ıaǵnı poezııa men án álemin sheber úılestirgen, jyrlarymen de, áýelete salǵan tamasha ánderimen de kórermen kóńilin rýhanı serpiltip, baıyta túskeni anyq.
Keshte aqyn poezııasynan qoıylǵan «Azattyq rýhy», «Altaı jyry», «Romans» qatarly poetıkalyq qoıylymdar kórsetilip, tanymal jas ánshilerdiń oryndaýynda «Máńgilik el» (áni B.Oraluly), «Túrkistanym-Turanym» (áni A.Sándibaıuly) ánderiniń tusaýy kesildi.
