«Shyn máninde, barlyq jetistiktiń bastaýy – adal eńbek. Tabysqa jetýdiń jalǵyz joly – óz kásibiniń sheberi bolý jáne erinbeı eńbek etý. Mańdaı terimen tabys tapqan adam ony maqsatsyz shashyp, ysyrap qylmaıdy. Únemshil, qanaǵatshyl ári uqypty bolady. Olar – shyn máninde, básekege qabiletti eńbekqor adamdar. Jastarymyzdyń sanasy sergek, eti tiri, shıraq bolýy qajet», dedi Memleket basshysy.
Jýyrda Qasym-Jomart Toqaev kóktemgi sý tasqyny kezinde aıanbaı eńbek etken azamattarymyzǵa alǵys jarııalaǵan edi. Elimizdiń aımaqtaryn qarǵyn sý alyp, halqymyzdyń basyna syn saǵaty týǵanda qol qýsyryp otyrmaı, tabıǵı apatpen kúreste erlik tanytqan sol jandardyń arasynda eldi gazben jabdyqtaý salasynyń qarapaıym qyzmetkeri Ábil Tólegenov te bar. Ol Atyraý óńirinde sý tasqynyna qarsy is-sharalarǵa belsendi atsalysyp, apattyń aldyn alý men zardabyn joıýǵa qosqan úlesi úshin Prezıdenttiń Qurmet gramotasymen marapattaldy.
«Bıylǵy kóktemde Jaıyqqa sýdyń mol kelýine baılanysty ózen arnasynan asyp, eldi mekenderdi sý basý qaýpi tóndi. Oral qalasynan bastap, Chapaev, Taıpaq aýdandary arqyly tómen jóńkilgen erigen qar sýy Inder aýdany men Mahambet aýdanyna jáne Atyraý qalasyna úlken qaýip tóndirdi. Kóp jyldan beri bolmaǵan orasan tasqyn kezinde gaz mamandary ózderine bekitilgen ýchaskelerdi táýlik boıy baqylap, bógetter salý men nyǵaıtý jumystaryna belsene qatysty. Atap aıtqanda, Mahambet aýdanyndaǵy Mahambet, Aqtoǵaı, Sarytoǵaı, Jalǵansaı, Saraıshyq, Beıbarys, Tańdaı, Aqqaıyń, Taldykól, Eńbekshil, Ortaqshyl, Esbol jáne Aqjaıyq aýyldarynyń basty gaz taratý qondyrǵylaryn, jerasty gaz qubyrlaryn aman saqtap qalý úshin gaz mamandary qyzmettik jáne azamattyq boryshyn óteýde kúsh biriktirip, kún-tún demeı eńbek etti. Elimizdi tezirek apattan qutqarý úshin jantalastyq. Sonyń arqasynda aýdan boıynsha birde-bir eldi meken kógildir otynnan ajyratylǵan joq. Sý tasqynynan keıin keıbir aýylaralyq jerasty gaz qubyrlaryn qalpyna keltirý jumystary júrgizildi. Qazirgi tańda jylytý maýsymyna oraı barlyq aýyl men eldi mekenderge kógildir otyn esh kedergisiz jetkizilip otyr. Bul – Mahambet gaz sharýashylyǵy qyzmetkerleriniń adal eńbeginiń jemisi», deıdi Á.Tólegenov.
Mahambet aýdanynyń týmasy Ábil Qabdyǵalıuly – Qazaq polıtehnıkalyq ınstıtýtynyń túlegi. Ol óziniń alǵashqy eńbek jolyn 1979 jyly aýdandyq aýylsharýashylyq mekemesinde qarapaıym jumysshy bolyp bastaǵan. 2014 jylǵa deıin ártúrli salada qyzmet etse, keıingi 10 jyldan beri «QazaqGaz Aimaq» AQ Atyraý óndiristik fılıalynyń Mahambet gaz sharýashylyǵynda ınjener.
Osy jyldarda aıtyp kelmeıtin talaı tabıǵı apatta, aqtútek boranda gaz qysymynyń tómen túsip ketýine baılanysty túrli jaǵdaılar bastan ótkenin eske alady keıipkerimiz.
«Árıne, ár jumystyń óz qıynshylyǵy bar. Sonyń ishinde gazben jabdyqtaý salasy óte kúrdeli ári qaýipti. Joǵary tehnologııalyq jabdyqtardy basqarýdy, qaýipsizdik sharalaryn qatań saqtaýdy talap etedi. Aýa raıynyń qolaısyzdyǵynan bólek, tehnıkalyq aqaý jıi bolyp turady. Mundaı kezde joǵary biliktilik pen tájirıbe qajet. Kez kelgen qateliktiń sońy aýyr zardaptarǵa soqtyrýy múmkin. Kógildir otyndy qaýipsiz paıdalaný, qaterdiń aldyn alý sharalaryn túsindirý – bizdiń jaýapkershiligimizde», deıdi gaz mamany.
Ol 2022 jyly qys qatty bolyp, apatty jaǵdaı jıilegenin aıtty. Bir aýylda apat oryn alyp, zaqymdalǵan gaz qubyryn jóndeýge ketken brıgada jolda saz balshyqqa batyp, túnimen baılanyssyz qalǵan eken.
«Tek tańerteń ǵana aıdaladan, gaz qubyry janynda tońyp qalǵan mamandarymyzdy áreń taýyp, qutqarǵan edik. Buǵan qosa kóligimen jolda qalyp qoıǵan taǵy bir otbasyn izdep taýyp, mashınamen aýylǵa súırep kelgenim bar. Halyq arasynda júrgen soń, túrli jaǵdaı bolyp jatady. Biz 24/7 rejiminde kúni-túni el qyzmetindemiz. «Gaz óshti» degen nemese basqadaı habarlama tússe boldy, aýa raıy ne basqa jaǵdaı dep qarap turmaı, kez kelgen táýekelge bel býyp, aqaýdy jóndeýge attanamyz. Sondyqtan óz eńbegimizge adal patrıotpyz dep aıta alamyn», deıdi ınjener.
Iá, halyqty gazben jabdyqtaý salasy mamandarynyń qıyn da jaýapty jumystary keıde kózge kórinbeı de jatatyny ras. Alaıda qystyń úskirik aıazyna, jazdyń aptap ystyǵyna qaramastan eldi der kezinde kógildir otynmen qamtamasyz etý, sondaı-aq qaýiptiń ótinde júrip, óz ómirin qaterge tige otyryp, qyzmet qylý – óz isine berik mamandardyń qolynan ǵana kelse kerek.
«Adal eńbek degenimiz – jaýapkershilikpen, uqyptylyqpen, shynaıylyqpen atqarylatyn is. Kóktemgi sý tasqyny jumystaryna qosqan úlesimdi baǵalap, marapattap jatqan Prezıdentimiz Qasym-Jomart Kemelulyna alǵysymdy bildiremin jáne mundaı qurmet eńbek adamyn qanattandyratynyn aıtqym keledi», deıdi keıipkerimiz.
Memleket basshysy 2025 jyldy «Jumysshy mamandyqtary jyly» dep jarııalaǵany belgili. Endeshe, aldaǵy jyly qurylys, aýyl sharýashylyǵy, ónerkásip sııaqty kez kelgen salada aıanbaı eńbek etip júrgen jumysshylarǵa erekshe kóńil bólinip, mártebesi artatyny anyq. Ásirese, arnaýly kásiptik bilimi bar jastardy mamanǵa muqtaj túrli salaǵa tartsa, elimizdegi jumyssyzdyq máselesiniń túıini sheshilýge tıis. Eń bastysy, halyqqa paıdasyn tıgizip júrgen osyndaı jandardyń eńbegi shynaıy elenip-eskerilip, baǵalansa degen ıgi tilegimiz bar.
