Prezıdenttiń ozyq oıly ult qalyptastyrý tapsyrmasyna oraı bul baǵyttaǵy sharalardyń aıasy keńeıip, bıyl 16-20 qazan aralyǵynda Qazaqstan baspagerleri men qalamgerleri «Frankfurt Buchmesse 2024» 76-shy halyqaralyq Frankfýrt kitap jármeńkesine qatysyp qaıtqan bolatyn. Qazaqstan ulttyq stendine 300-ge jýyq baspa ónimderi qoıyldy. Qazaqstan jazýshylarynyń eńbekteri nasıhattaldy. «Atamura», «Almaty kitap», «Mektep», «Arman-PV», taǵy basqa baspalar halyqaralyq kelisimderge qol qoıyp, tyń jobalardy iske asyrýdy josparlap qaıtty. Osy áriptestik negizinde «Frankfurt Buchmesse 2024» halyqaralyq kitap kórmesiniń ókilderi alǵash ret Ortalyq Azııa kelip, «Uly jibek jolymen» halyqaralyq kitap jáne polıgrafııa kórmesine qatysty.
Kórmeniń ashylý saltanatyna Iran konsýly Faganı Mohsen, Máskeý qalasynyń syrtqy ekonomıkalyq jáne halyqaralyq baılanystar Departamenti basshysy orynbasary I.P. Tkach, Frankfýrt kitap jármeńkesiniń negizgi klıentterdi basqarý jáne satý jónindegi menedjeri Vladka Kýpska, Máskeý qalasynyń syrtqy ekonomıkalyq jáne halyqaralyq baılanystar departamentiniń otandastarmen jumys jáne aqparattyq saıasatty qamtamasyz etý basqarmasynyń keńesshisi A.V.Sýlıma, taǵy da basqa mártebeli meımandar qatysty.
Kórmeniń saltanatty ashylýynda Mádenıet jáne aqparat mınıstrligi Arhıv, qujattama jáne kitap isi komıteti Baspa isi basqarmasynyń basshysy Almaz Myrzahmetov, Ǵylym jáne joǵary bilim mınıstriniń keńesshisi Rýslan Emelbaev, Qazaqstan Jazýshylar odaǵy tóraǵasynyń orynbasary Ǵalym Qalıbekuly, jazýshy, Qazaqstannyń eńbek sińirgen qaıratkeri Álibek Asqarov, Reseı kitap shyǵarýshylar qaýymdastyǵynyń dırektory K.V.Chechenev, Almaty qalasy ákimi apparaty Almaty qalasy ákimdiginiń Ádep jónindegi ýákili Mamaı Ahetov, Reseı kitap odaǵy joalarynyń jetekshisi A.A. Novokshova, Almaty qalasy Bilim basqarmasynyń Bilim berýdegi jańa tehnologııalar qalalyq ǵylymı-ádistemelik ortalyǵy bóliminiń ádiskeri Aıjan Askerqyzy sóz sóılep, halyqaralyq kitap kórmelerin ótkizý rýhanı, mádenı baılanystardyń damýyna, sonymen birge álemde kitap isin damytýǵa yqpal etetindigin atap ótti.
Kitap kórmesine elimizdegi «Atamura», «Almaty kitap», «Mektep», «Arman-PV», «Daryn», «Adal Kitap», «Smart University» baspalarynyń ónimderi qoıyldy. Kórme barysynda jańa shyqqan kitaptardyń tusaýkeseri josparlanǵan.
Úsh kún ishinde Germanııa, Reseı, Qyrǵyzstan, О́zbekstan, Iran elderinen kelgen baspagerler, polıgrafıster men kitap taratýshylar iskerlik baılanystaryn damyta otyryp, birlesken jobalardy iske asyrmaq.
ALMATY
