Oqý aǵartý mınıstrliginiń Bala quqyqtary jónindegi Batys Qazaqstan oblysyndaǵy ýákili Janat Nurmaǵambetovamen balalar arasyndaǵy sýısıdtiń aldyn alý máselesi jóninde sóıleskenimizde: «О́z-ózine qol jumsaýdyń aldyn alý, qaýipti sebepterin anyqtaý, sýısıd jumsaýǵa árekettengen adamdardy baqylaý máselelerin tikeleı psıhıkalyq densaýlyq ortalyǵynyń mamandary júrgizedi. Sondaı-aq mundaı jaǵdaılardy polısııa tirkeýge alady. Al meniń salam – adam quqyqtaryn saqtaý. Degenmen bala quqyǵy jónindegi óńirlik ýákil bolǵandyqtan, qyzmetimniń bir bóligi retinde osy máselemen de aınalysýǵa týra keledi», dep bastady sózin.
J.Nurmaǵambetova osyǵan deıin Batys Qazaqstan oblysy aýmaǵynda «Amanat» partııasy fılıalynyń janynan qurylǵan komıssııamen birlesip, kóshpeli otyrystar ótkenin, sol otyrystardyń bir taqyryby kámeletke tolmaǵandar arasynda sýısıdtiń aldyn alýǵa arnalǵanyn, bul máseleni sheshýdiń bir joly retinde mobıldi top qurý usynylǵanyn tilge tıek etti.
«Biz aıtyp otyrǵan mobıldi toptardyń quramyna óńirdegi aqsaqaldar, qurmetti azamattar, ata-analar, mektep, psıhologter, t.b. kirýi kerek. Iаǵnı «ata-ana – mektep – memleket» degen ózara árekettesý «úsh taǵany» qurylady. Balalar ombýdsmeni qyzmetine alǵashqy kirisken kúnimnen bastap, barlyq quzyretti organnyń ózara birlesip is-qımyl jasaý kerek ekenin aıtyp kelemin. Sebebi balalardyń quqyǵyn buzý, qorqytý, olardy sýısıdke deıin jetkizý sııaqty problemalardy bir ǵana mekeme, organ sheshe almaıdy. Qoǵamnyń bul problemasy ózdiginen sheshiletindeı qur qol qarap otyrmaı, ózekti máselelerine ýaqtyly jaýap berýge tıispiz. Ol úshin men aıtqan «úsh taǵan» birlese jumys jasaýy qajet», deıdi Bala quqyǵy jónindegi ýákil.
Sarapshy adam quqyqtaryn, ásirese, balalardyń quqyǵyn saqtaý máselesinde kıberqaýipsizdikke qatysty problemalardy umytýǵa bolmaıtynyn eskertti. Ol jasóspirimderdiń sýısıdine ǵalamtordaǵy túrli oıyndardyń sebep bolatynyn, mobıldi qosymshalarǵa qatysty ata-analardyń arasynda alańdaýshylyq bar ekenin aıta kelip: «Internettegi túrli qaýipti oıyndar jasóspirimderdiń názik psıhıkasyna áser etip, óte kúrdeli hám qatal qadamdarǵa barýǵa ıtermeleıdi. Mobıldi qosymshalardaǵy oıynda jasóspirim ata-analarmen janjaldasý, úıden qashý, belgili bir deńgeılerden ótkennen keıin QR kodtary men jedelhat arnasyna siltemeler alý sekildi tapsyrmalardy oryndaıdy. Bul tapsyrmalar barǵan saıyn aýyrlap, jetkinshekti tikeleı óz-ózine qol jumsaýǵa deıin jetkizedi. Birinshiden, bizdiń quzyretti organdarymyz osyndaı qosymshany júkteýge bolatyn platformalardy buǵattaýy kerek dep oılaımyn. Ekinshiden, ata-analar men balalardyń zańdy ókilderi olardyń qandaı oıyn oınap júrgenin nazardan tys qaldyrmaýy qajet», dedi.
Mamannyń aıtýynsha, balalarymyzdyń barlyq qaýipsizdigine bárimiz jaýaptymyz. Sondyqtan da sýısıdtiń aldyn alý máselesinde memlekettik qurylymdar, pedagogter, psıhologter jáne ata-analar qoǵamy birlese áreket etý kerek. Sonda ǵana oń nátıjege qol jetkizemiz.
