El aımaqtaryndaǵy qurylys kompanııalary men aýqatty kásipkerler Almaty qalasynan turǵyn úı keshenderin salýǵa qulshynatyny anyq. Alaıda jarnamasy jer jarǵan keıbir keshenderdiń qujatynan shıkilik shyǵyp, sergeldeńge túsken salymshylar az emes. Jaýaptylar ótken jyldyń ózinde 30-dan asa turǵyn úı zań talaptaryna saı salynbaǵanyn, sapaǵa salǵyrt qaraǵan keıbir nysandar súrilgenin aıtady. Byltyr qurylys nysandaryna júrgizilgen 740 tekserý sharasy barysynda 956 zań buzýshylyq anyqtalyp, jaýaptylar 187 mln teńge aıyppul arqalaǵan. Bul – qala ákimdiginiń jospardan tys tekserý jumystarynyń nátıjesinde júzege asqan istiń bir parasy ǵana.
Almaty qala qurylysyn baqylaý basqarmasy qurylysy jón-josyqsyz júrip jatqan turǵyn úı keshenderin jarııalap, tizimin júıeli túrde jańartyp otyrady. Azamattar alýǵa keńes berilmeıtin kúmándi nysandardyń tizimimen ákimdiktiń saıty arqyly tanysa alady.
«2023 jyldan bastap búgingi tańǵa deıin zańsyz 35 nysan súrildi. Almaty qalasynyń qalalyq qurylys baqylaý basqarmasy tekserýdi óz betimen júrgizbeıdi. Resmı túrde aryz bolýy kerek. Atalǵan aryz túskennen keıin basqarma quqyqtyq statıstıka jáne arnaıy esepke alý departamentinde tekserýdi taǵaıyndap, sodan keıin jumysyn bastaıdy. Eger siz qandaı da bir turǵyn úıdi alýǵa nıettenip jatsańyz, onyń lısenzııasy, tıisti qujattary baryn KJK-nyń saıtynan qarap teksere alasyz. Kompanııa ókilderimen kezdesip, qujattardy kórsetýin talap etińiz. Qalada birqatar turǵyn úı súrilýi múmkin. Al jurt olardy satyp alyp úlgergen. Sondyqtan sheshim qabyldar aldynda sarapshylarmen sóılesken jón», deıdi qala qurylysyn baqylaý basqarmasyndaǵylar.
Taý bókterlerine qurylys jumystaryn júrgizý seısmıkalyq aımaqta ornalasqan qala úshin qanshalyqty qaýipti ekeni aıtylsa da, bul másele kóbine eskerile bermeıdi. О́tken jyldyń úsh toqsanynda qala qurylysyn baqylaý basqarmasy megapolıstiń taýly alqaptarynda zańsyz salynyp jatqan 52 qurylys nysanyn anyqtaǵan. Atap aıtar bolsaq, Bostandyq aýdanyndaǵy – 21, Medeý aýdanyndaǵy – 24, Naýryzbaı aýdanyndaǵy 7 nysanǵa qatysty is qozǵalǵan.
– Qurylys salasyn baqylaýdy barynsha kúsheıtý qajet. Keıbir alyp kompanııalar tekserýge des bermeýge tyrysatyny anyq. Tártipti barynsha qatańdatyp, ár nysandy búge-shigesine deıin qadaǵalaǵan abzal. Keıingi 20 jylda tektonıkalyq aıryqtarǵa jaqyn ornalasqan jerlerde, tipti taý bókterlerine deıin turǵyn úıler salynyp ketti. Onyń ústine turǵyn úı alańdaryndaǵy kólik turaqtarynyń mólsheri eseptelmeıdi. Onsyz da tyǵyz ornalasqan qalanyń tynysyn odan ári taryltpaý úshin aıadaı aýmaqqa ondaǵan qabatty úı salýdy toqtatý kerek, – deıdi qoǵam belsendisi Nurlan Asqaruly.
Qurylys salýshy qarajatty qaıtarýdan bas tartsa, zańsyz turǵyn úıden páter alǵan azamattar quqyq qorǵaý organdaryna júginý kerek. Al qarajaty jetpeı taqyrǵa otyrǵan kompanııalar kepildikti arttyrýǵa kóbirek kóńil bólgeni abzal. Jaýapty mamandar zań tetikterin óz paıdasyna asyryp jatqan qurylys kompanııalarynyń da az emes ekenin alǵa tartady. Qoldanystaǵy zańnamaǵa sáıkes, úleskerlerdiń qarajatyn tartý úshin 3-qabatqa deıingi úılerde, taýnhaýstarda ruqsat talap etilmeıdi.
ALMATY
