Foto: Ashyq derekkóz
Ánshi jańa beınebaıanynyń úzindisin Instagram paraqshasynda, al tolyq nusqasyn YouTube arnasynda jarııalady.
«Dostar, erekshe yqylaspen jáne zor qýanyshpen búgin men sizderge saǵat 10:00 de YouTube-taǵy paraqshamda «Kıeli meken» ánine beınebaıandy usynamyn. Jańa mýzykalyq jumys meniń Otanymnyń tańǵajaıyp kórkemdigine arnalǵan! Beınebaıanda biz Qazaqstannyń biregeı tabıǵı landshafttary men baı mádenıetin pash etýge tyrystyq. Men Qazaqstan álemniń túkpir-túkpirindegi týrısterdiń tartylatyn ortalyǵyna aınalatynyna senimdimin. Klıp jaıly óz áserlerińizben bólisińizder jáne aınalamyzda ásemdik kóp ekenin umytpańyzdar!», dep jazdy Dımash Qudaıbergen.
Jańa beınebaıanda Qazaqstannyń kórikti jerlerine erekshe nazar aýdarylǵan. Kórermender kórnekti týrıstik oryndarǵa vızýaldy saıahat jasaı alady. Onyń ishinde Sharyn shatqaly, Kólsaı kólderi, Aqmeshit úńgiri, Áziret-Sultan murajaı-qoryǵy, Bozjyra shatqaly, Torysh alqaby tárizdi biregeı oryndar bar. Vıdeoda Býrabaı, Katonqaraǵaı, Altyn-Emel, Jońǵar-Alataý ulttyq parkteriniń kadrlary da usynylǵan.
Aıta keteıik, túsirilim Almaty, Túrkistan, Mańǵystaý oblystary týrızm basqarmalarynyń, sondaı-aq «Visit Alatau» jáne «Open Turkistan» týrıstik aqparattyq ortalyqtarynyń, «Captas» ortalyǵynyń, «Air Astana» jáne «FlyArystan» avıakompanııalarynyń, «Karavansaray Turkistan» kesheniniń, «Visit Aktay» jáne «Integra Construction KZ» kompanııalarynyń qoldaýymen ótti.«Biz Dımashqa elimizdi shetelde dáripteýge qosyp júrgen baǵa jetpes úlesi úshin alǵys bildiremiz. Ol týrızmniń alǵashqy elshisi bolyp, árbir qolaıly jaǵdaıda sheteldik aýdıtorııany Qazaqstanǵa kelýge shaqyrady. Mıllıondaǵan tyńdaýshylar Dımashtyń shyǵarmashylyǵy arqyly bizdiń elmen keńinen tanysady. Jańa beınebaıan - Qazaqstannyń ádemi tabıǵaty men baı mádenıetiniń alýan túrliligin kórsetýge degen ortaq umtylysymyzdyń nátıjesi. Biz álemniń túkpir-túkpirindegi Dımashtyń jankúıerleri biregeı lokasııalardan shabyt alyp, elimizdi ózderi úshin ashatynyna senimdimiz», dedi «Kazakh Tourism» UK» AQ Basqarma tóraǵasy Qaırat Sádýaqasov.
