«Arnaıy operasııalar kúshteri ulttyq qaýipsizdikti qamtamasyz etý júıesin jetildirý úshin qurylǵan. Onda úzdik mamandar qyzmet atqarady, bólimsheler tehnıka men qarý-jaraqtyń zamanaýı úlgilerimen jabdyqtalǵan. Biz oqý-materıaldyq bazany nyǵaıtý úshin únemi sharalar qabyldaımyz. Sizderdiń júktelgen tapsyrmalardy joǵary tıimdilik koeffısıentimen oryndaı alatyndaryńyzǵa senimdimin», dep atap ótti general-polkovnık Rýslan Jaqsylyqov.
Qorǵanys mınıstri jaýyngerlik áleýetti odan ári arttyrý, materıaldyq-tehnıkalyq bazany jetildirý, áskerı tártip pen áskerı qyzmet qaýipsizdigin nyǵaıtý jáne oqý ortalyqtary men áskerı bólimderdiń ınfraqurylymyn damytý boıynsha birqatar mindetter qoıdy. Qorǵanys vedomstvosynyń basshysy jaýyngerlik jáne arnaıy daıyndyq nátıjelerine de nazar aýdardy.
Esterińizge sala keteıik, Qazaqstan Respýblıkasy Qarýly kúshteriniń Arnaıy operasııalar kúshteri Memleket basshysynyń Jarlyǵymen 2022 jyldyń qańtarynda qurylǵan edi. О́tken eki jylda Arnaıy operasııalar kúshteri bólimsheleri óz sheberlikterin shyńdaı otyryp, birneshe ret aýqymdy respýblıkalyq jáne halyqaralyq oqý-jattyǵýlarǵa qatysty. 2023 jyldyń qyrkúıeginde «Batyl toıtarys» strategııalyq komandalyq-shtabtyq oqý-jattyǵýynda Qazaqstan Prezıdenti – Qazaqstan Respýblıkasy Qarýly kúshteriniń Joǵarǵy Bas qolbasshysy Qasym-Jomart Toqaev Arnaıy operasııalar kúshteriniń qolbasshylyǵyna Jaýyngerlik tý tabys etti.
