Sýret: gov.kz
Oblys eldi mekenderdegi sý tasqynynyń aldyn alý jumystary josparǵa sáıkes búgingi kúni 80 paıyzǵa oryndalǵan. Borodýlıha jáne Kókpekti aýdandaryndaǵy qaýiptiń aldyn alý sharalary qarasha aıynyń sońyna deıin aıaqtalady. Tótenshe jaǵdaıǵa daıyndyq jumysyn jandandyrý maqsatynda arnaıy qurylymdyq kúshter men tehnıkalyq quraldar toby quryldy. 1345 adam, 460 tehnıka, 19 júzý quraldary, sondaı-aq 161 sý sorý qurylǵysy daıyndalǵan. Sondaı-aq Tótenshe jaǵdaılar departamentiniń málimetinshe, 11 qaıyq pen 2 releftik tehnıka satyp alynǵan.
«Basty mindetimiz – turǵyndardy kóktemgi sý tasqynynan qorǵaý. Bul baǵytta júıeli jumys júrgizilip jatyr. Naqty aıtqanda, tehnıkalar jańartylyp, qutqarýshylar toby kúsheıtildi. Gıdrotehnıkalyq qurylystardy nyǵaıtý sharalary júzege asyryldy. Oblys 2025 jylǵy sý tasqyny kezeńine tolyq daıyn bolýy kerek. Qala men aýdan ákimderine sý tasqynyna daıyndyq máselelerin qatań baqylaýda ustaýdy tapsyramyn», dedi N.Uranhaev.
Abaı oblysynyń aýmaǵynda búginde sý qoımalary, bógetter men sý sharýashylyǵy qurylystaryn qosa alǵanda 38 tirek gıdrotehnıkalyq nysan bar. 2025 jyly eki sý qoımasy men tórt sý jınaý toǵanyn qaıta jańǵyrtýdyń jobalyq-smetalyq qujattamasyn ázirleý josparda tur. Bul jumystar Úkimet qaýlysymen bekitilgen sý salasyn damytýdyń keshendi josparyn júzege asyrýǵa, sý tasqyny kezindegi qaýipti barynsha azaıtýǵa, halyqtyń qaýipsizdigin saqtaýǵa múmkindik beredi.
Abaı oblysy
