Qasıetti Quran aıattaryn oqýmen bastalǵan jıynda Bas múftı el men jerdiń amandyǵyn tilep, duǵa jasady.
«Qazir bizdiń qoǵamda otbasyndaǵy zorlyq-zombylyq máselesi óte ózekti. Degenmen erli-zaıyptylardyń ózara jaqsy mámilede bolyp, meıirimdiliktiń aıasynda qarym-qatynas jasaýlary otbasy baqytynyń negizgi kilti sanalady. Alla Taǵala Qasıetti Qurannyń «Rým» súresinde: «Senderge jandaryń jaı tapsyn dep, óz bolmystaryńnan jubaılar jaratyp, aralaryńa súıispenshilik pen meıirim sezimin uıalatqany Onyń (Allanyń) naq belgilerinen. Mine, osynyń ózin aqylǵa salyp oılanatyn qaýym úshin aıqyn dálelder bar», dep aıtqan. Sondaı-aq «Táýbe» súresiniń 71-aıatynda: «Múmin erler men múmin áıelder – bir-birine shyn janashyr dos. Olar elge izgilikti, jaqsylyq jasaýdy buıyryp, jamandyq ataýlydan tyıady...» delingen. Budan túsinetinimiz, jaqsy er men áıel – birin-biri tolyqtyryp, aıyby bolsa jasyryp, jaqsylyǵyn asyryp otyratyn ıgi jandar», dedi QMDB Tóraǵasy.
Konferensııada Jetisý oblysy ákiminiń orynbasary Dıas Rahmetuly, dintanýshy professor Shámshádın Tursynuly, Jetisý oblystyq ardagerler úıiniń tóraǵasy Ermek Ábilmájinuly jáne ózge de zııaly qaýym ókilderi qatysyp, otbasy qundylyǵyn arttyrý jaıly usynys-pikirlerin bólisti. Sonymen qatar Bas múftı Naýryzbaı qajy Taǵanuly BAQ ókilderine búgingi konferensııa jóninde suhbat berdi.
