Startap akademııasynyń 3.0 tanystyrylymyna Ortalyq Azııadaǵy «TikTok» bıznesti damytý departamentiniń basshysy Iýlııa Kýshnır qatysty. Onyń aıtýynsha, «TikTok» kásipti tez dóńgeletýge yqpal etetin platforma. О́ıtkeni onda az ýaqytta úlken aýdıtorııaǵa jetýge bolady. Startaptardyń basty mindeti – tutynshýlardy tartý jáne brendin tanymal etý. Sondyqtan «TikTok» bıznes úshin jarnama alańy ǵana emes, kreatıvti sheshimderdi júzege asyrýǵa múmkindik beretin keremet qural. Platforma arqyly startaptar ózderiniń brendi men ónimderin halyqaralyq naryqtarǵa tanytý múmkindigine ıe bolady. «TikTok for Business» startaptarǵa óz aýdıtorııasyn tabýǵa, ónimderin jarnamalaýǵa, básekege qabiletti bolýǵa kómektesedi.
Jobanyń mán-maqsatyn túsindirgen ol «TikTok» platformasy startaptar úshin úlken múmkindigin usynatyn alań ekenin atap ótti.
«Qazirgi sıfrlyq dáýirde kreatıvti strategııalar men kontent jasaýdyń mańyzy zor. «TikTok» osyndaı mindetterdi oryndaýǵa múmkindik beretin platformaǵa aınaldy. Platformada jyldam ıdeıalar tabýǵa, vıdeo jasaýǵa, montajdaýǵa, óz shyǵarmashylyq oılaryńyzdy júzege asyrýǵa múmkindik beretin kóptegen qural bar. Bul startaptarǵa bıznes strategııalaryn jetildirip, naryqta tanylýǵa jol ashady. Al «TikTok» startap akademııasy aıasynda qatysýshylar ózderiniń bıznes strategııalaryn tanystyryp, jańa aýdıtorııaǵa qol jetkizýge, tabys tabýǵa «TikTok» múmkindigin qoldanýdy úırenedi», dedi ol.
Bul jobany «TikTok» «Astana Hub» ortalyǵymen birlesip júzege asyryp otyr. Ortalyq dırektory Maǵjan Mádıev «TikTok»-tyń startaptar akademııasymen uzaqmerzimdi seriktestiginiń mańyzyn atap ótip, bul yntymaqtastyqtyń aımaqtyq IT-salasynyń damýyna zor yqpal etkenin aıtty.
«Biz «TikTok» kompanııasymen uzaq ýaqyttan beri seriktes retinde jumys istep kelemiz. «Astana Hub»-tyń basty mindeti – IT-jobalardy damytý. Osyǵan baılanysty bizdiń kásipkerlerimizdiń eń mańyzdy maqsaty – tutynýshylardy tartý. Al «TikTok» – búgingi tańda álemdegi eń iri ári qarqyndy damyp kele jatqan sıfrlyq platforma. О́tken jyly Memleket basshysy men «TikTok»-tyń bas dırektory Shoý Szy Chý kezdesken. Osydan keıin «TikTok» kompanııasy Astanada óz keńsesin ashqan bolatyn. Sondaı-aq sol kezde «TikTok» startap akademııasyn bastadyq. Aldaǵy ýaqytta bilim baǵdarlamalary boıynsha birlesip joba jasaýdy josparlap otyrmyz», dedi M.Mádıev.
«TikTok Startup Academy» alǵash ret 2022 jyly elimizde bastaý alǵan. Alǵashqy maýsymda 286 ótinimniń ishinen 56 startap iriktelip, onyń 9-y grantqa ıe bolǵan. Ekinshi maýsymda baǵdarlama О́zbekstan men Ázerbaıjandy qamtyp, 16 startapty oqytyp, 6 jobaǵa qoldaý kórsetti. Bıyl 4 elden 176 ótinim túsip, olardyń ishinen eń úzdik 40 joba tańdalyp alynǵan. Iý.Kýshnır úzdik jobalar bıyl da qarjylaı grantqa ıe bolatynyn aıtty.
«Bizge tórt elden, atap aıtqanda, Qazaqstan, О́zbekstan, Qyrǵyzstan, Ázerbaıjannan 40 startap kelip otyr. Olar «Pitch» sessııasyna qatysyp, «TikTok»-ta bıznesin ilgeriletý strategııalaryn qorǵap, talqylaıtyn bolady. Is-shara nátıjesinde 10 jeńimpazdy anyqtalyp, árqaısysyna «TikTok for Business» platformasynda jarnama jasaýyna 3 000 dollar kóleminde grant tabystaldy. Jalpy, grant qory 30 000 dollardy quraıdy», dedi ol.
Qatysýshylardyń kópshiligi jasandy ıntellekt, bilim, týrızm, fınteh, mádenıet salalaryna qatysty jobalardy tanystyrdy. Jasandy ıntellekt salasyndaǵy startaptar jańa tehnologııalardy qoldana otyryp, ónimderi men qyzmetterin jetildirýge umtylsa, bilim jobalary jastarǵa arnalǵan jańa formattaǵy kontent ázirleýge kúsh salyp jatyr. Sonymen qatar týrızm salasyndaǵy startaptar týrızmdi sıfrlandyrý baǵytyn ustanǵan. Al qarjy tehnologııasy salasyndaǵy qatysýshylar ekonomıkany sıfrlandyrý, qarjylyq qyzmetterdi jetildirý maqsatynda jobalar usynǵan. Olar «TikTok» platformasyn paıdalaný arqyly olar óz qyzmetterin halyqaralyq naryqqa shyǵarýdy kózdep otyr.
Máselen, buǵan deıingi qatysýshylar arasynda bolǵan «Tastamat» startap jobasy «TikTok» platformasy arqyly úlken jetistikterge jetip, jaqsy nátıje kóretken. Olar az ýaqyttyń ishinde «TikTok»-ta 8000-nan astam jańa oqyrman jınap, tabysyn 30 paıyzǵa arttyrǵan. Bul «TikTok» platformasynyń shaǵyn jáne orta bıznes úshin tıimdiligin dáleldeıdi.
«TikTok» startap akademııasy baǵdarlamasynyń qorytyndy brıfıngine qatysqan Maǵjan Mádıev, akademııanyń basty maqsatyn túsindirdi.
«Is-sharanyń basty maqsaty – «TikTok» startap akademııasy baǵdarlamasynyń qorytyndysyn shyǵarý. Biz joba aıasynda qatysýshylarǵa «TikTok» platformasyn qalaı qoldanýdy úırettik. Árbir IT-bızneske bul óte mańyzdy. Endi olardyń arasynan úzdigin anyqtaıtyn bolamyz», dedi «Astana Hub» ortalyǵy dırektory.
